Mańǵystaý oblysynda 71 bloger kirisin jasyrǵan

AQTAÝ. KAZINFORM – Mańǵystaý oblysynda 71 blogerdiń shottarynan 12,9 mıllıard teńge sáıkessizdikter anyqtaldy. Bul týraly Mańǵystaý oblysy boıynsha Memlekettik kirister departamenti habarlady.

Memlekettik kirister departamentiniń málimetinshe, salyq mindettemelerin tolyq oryndaý maqsatynda blogerlerdi qosa alǵanda, jeke tulǵalarǵa salyqtyq ákimshilendirý turaqty túrde júrgizilip jatqany habarlanyp keldi. Alaıda, baqylaý sharalarynyń nátıjesinde sáıkessizdikter anyqtaldy. 

- Mańǵystaý oblysynda túrli aqparat kózderinen alynǵan derekterdi usynylǵan salyq deklaratsııalarynyń málimetterimen salystyrý qorytyndysy boıynsha 71 tulǵaǵa 12,9 mıllıard teńgege sáıkessizdikter tabyldy. Soǵan sáıkes, osy azamattarǵa aǵymdaǵy jyldyń 13-14 aqpany aralyǵynda «kiristerdi tómendetý» buzýshylyqtary boıynsha, kameraldyq baqylaý habarlamalary jiberildi, - delingen departament usynǵan habarlamada.

Al, habarlamany oryndaý maqsatynda derbes eseptelgen salyqtardy tóleı otyryp, qosymsha salyq eseptiligi tapsyrylýy tıis. Ol úshin 30 kún ýaqyt berilgen. Kelispegen jaǵdaıda túsindirmeni usyný qajet.

Departament mamandary sonymen qatar, tabys alý kezinde salyqtardy tóleý qajettiligine, onyń ishinde ártúrli ınternet-resýrstarynda onlaın-jarnamalardy jarııalaýǵa (aqparattyq ónimderdi jyljytý nemese satý, ártúrli oqytý kýrstaryn satý, utys oıyndaryn ótkizý jáne t.b.) nazar aýdarady.

Buǵan deıin tabysyn 53,3 mlrd teńgege jasyrǵan blogerler anyqtalǵanyn habarladyq.

Sodan soń belgili bloger 100 mln teńge kiristi memleketten jasyryp qalý múmkin emestigin aıtty.