Mańǵystaý oblysynda 700-den astam sarbaz áskerı ant berdi
ASTANA. KAZINFORM — «Batys» óńirlik qolbasshylyǵynyń Aqtaý garnızonyndaǵy teńiz jaıaý áskerleri brıgadasy men Beıneýdegi barlaý polkiniń jas jaýyngerleri Otanǵa adal qyzmet etýge ant qabyldady, dep habarlaıdy Qorǵanys mınıstrliginiń baspasóz qyzmeti.
Saltanatty is-sharaǵa áskerı bólimderdiń komandırleri, Qarýly kúshterdiń ardagerleri, qoǵamdyq uıym ókilderi, sarbazdardyń ata-analary men jaqyndary qatysty.
Aqtaý garnızonynda ásker qataryna jańadan qosylǵan jaýyngerlerdi quttyqtaǵan «Batys» óńirlik qolbasshylyǵy áskerleriniń qolbasshysy general-maıor Baýyrjan Artyqov jastarǵa júrekjardy tilegin jetkizdi.
– Búgin – tek sizder úshin ǵana emes, búkil elimiz úshin aıryqsha kún. Áskerı ant – ár azamattyń ar-namysy men ómirlik ustanymy. Sizderdiń áskerdegi qyzmetterińiz minez qalyptastyryp, bolashaq jetistikterińizge berik negiz qalaıdy dep senemin, – dedi ol.
Ant qabyldaý rásiminen soń jas sarbazdar saptyq daıarlyq, qarýmen áreket etý, qala jaǵdaıyndaǵy is-qımyldar jáne shartty áýe qarsylasynyń shabýylyn toıtarý sııaqty kórsetilimder jasady.
– Qyzmettiń alǵashqy kúnderinen bastap komandırlerdiń qamqorlyǵyn, áskerı ujymnyń qoldaýyn sezindik. Ant berý men úshin erekshe maqtanysh sáti boldy. Elim úshin adal ári jaýapkershilikpen qyzmet etýge daıynmyn, – dedi Batys Qazaqstan oblysynan teńiz jaıaý áskerleri brıgadasyna shaqyrylǵan qatardaǵy jaýynger Ádil Alhamov.
Aqtaý, Beıneý garnızondaryndaǵy rásim aıaqtalǵan soń qonaqtar úshin arnaıy ekskýrsııa uıymdastyryldy. Ata-analar kazarmalar men ashanalardy, oqý synyptaryn aralap, jattyǵý keshenderi men aldaǵy ýaqytta sarbazdar paıdalanatyn qarý-jaraq pen tehnıkany kórdi. Dástúr boıynsha saltanatty is-sharadan keıin jaýyngerler alǵash ret týystarymen birge qalaǵa shyǵýǵa múmkindik aldy.
Aldaǵy aılarda sarbazdar jas mamandar baǵdarlamasy boıynsha oqytylyp, artıllerıst, tankıst, baılanysshy, atqysh, barlaýshy jáne basqa da áskerı-eseptik mamandyqtardy meńgeretin bolady.
Budan buryn «Otan qorǵaýshylar» alańynda astanalyq 68665 áskerı bólimi jas sarbazdarynyń áskerı ant qabyldaý rásimi ótkenin jazǵan edik.