Mańǵystaý oblysynda 527 kóshedegi esirtki jarnamasy bar graffıtıler óshirildi
AQTAÝ. KAZINFORM – Mańǵystaý oblysynyń prokýrory Aıdos Maılybaev esirtki qylmysyna qarsy is-qımyl boıynsha qabyldanǵan sharalardyń tıimdiligi týraly Alqa otyrysyn ótkizdi.
Otyrys barysynda oblys ákimi orynbasarynyń, quqyq qorǵaý jáne arnaıy organdary basshylarynyń esepteri tyńdalyp, óńirdegi esirtki bıznesiniń aldyn alý men oǵan qarsy kúrestiń jańa tásilderi aıtyldy. Sondaı-aq jıynda nashaqorlardyń esebin júrgizý, «dárihana nashaqorlyǵynyń» damýyna jol bermeý, kámeletke tolmaǵandardy esirtki bıznesine tartý jáne prekýrsorlardyń baqylaýsyz ımporty máseleleri talqylandy.
Jyl basynan beri 354 esirtkiniń zańsyz aınalymyna qatysty jalpy sotqa deıingi tergep-tekserýler tirkelgen. Tárkilengen esirtki jáne psıhotroptyq zattardyń jalpy salmaǵy 100 myń grammnan asyp jyǵylady.
Prokýrorlardyń bastamasymen 11 saıt pen siltemeler buǵattalyp, 527 kóshedegi esirtki jarnamasy bar graffıtıler ketirildi jáne marıhýana ósiretin fıto zerthanalary joıyldy.
«Quqyq qorǵaý jáne arnaıy organdar qyzmetiniń tıimdiliginiń negizgi kórsetkishteri – esirtki zerthanalaryn anyqtaý jáne arnalarynyń jolyn kesý, sondaı-aq nashaqor azamattar sanynyń azaıýy», - dedi Mańǵystaý oblysynyń prokýrory Aıdos Maılybaev.
Otyrys qorytyndysy boıynsha kelip túsken usynystardy eskere otyryp, oblystyń ýákiletti organdaryna nashaqorlyq pen esirtkiniń zańsyz aınalymynyń aldyn alý jáne oǵan qarsy kúres boıynsha qabyldanǵan sharalardy kúsheıtý boıynsha tapsyrmalar berildi.
