Mańǵystaý oblysynda 500-den astam nysan múmkindigi shekteýli jandarǵa beıimdelgen
ASTANA. KAZINFORM – Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Mańǵystaý oblysynda 567 áleýmettik ınfraqurylym nysany tolyq beıimdeldi.
Qazirgi ýaqytta Qazaqstan Respýblıkasynda 2025-2030 jyldarǵa arnalǵan ınklıýzıvti saıasat tujyrymdamasy, «Amanat» partııasynyń 2023-2027 jyldarǵa arnalǵan jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda.
«Amanat» partııasynyń jol kartasynda 2023-2027 jyldar aralyǵynda ınteraktıvti qoljetimdilik kartasyna engizilgen 42 myńnan astam nysandy beıimdeý boıynsha jumys kózdelgen. Jyl saıyn osyndaı obektilerdiń 20%-y beıimdelýi tıis. Osylaısha, 2023 jyly – Kartadaǵy obektilerdiń 20%, 2024 jyly – 40%, 2025 jyly – 60%, 2026 jyly – 80%, 2027 jyly – 100%-y beıimdeledi. Qazirgi ýaqytta el boıynsha 23 206 nysan tolyqtaı beıimdelgen.
Búgingi tańda Mańǵystaý oblysynda 567 nysan beıimdeldi. 2025 jyldyń sońyna deıin taǵy 368 nysandy beıimdeý josparlanýda.
Beıimdelgen nysandardyń jalpy sanynan múgedektigi bar adamdardyń barlyq sanattary úshin qoljetimdileri:
- densaýlyq saqtaý obektileri– 87;
- bilim berý nysandary – 259;
- mádenıet nysandary – 28;
- memlekettik jáne kvazımemlekettik uıymdar – 73;
- sport nysandary – 9;
- áleýmettik qorǵaý obektileri – 4;
- saýda nysandary men oıyn-saýyq ortalyqtary – 81;
- kólik obektileri - 2;
- basqalar - 24.
«Nurmuhan Jantórın atyndaǵy oblystyq mýzykalyq-dramalyq teatryna barǵanymda, ǵımaratqa kirý qanshalyqty qoljetimdi bolǵanyn kórip qýanyp qaldym jáne jaqynda qalamyzdaǵy eń úlken sýpermarket – «Dınadan» saýda jasadym, onda kóp taýar alýǵa óte yńǵaıly boldy, kirip-shyǵýǵa jaǵdaı jasalǵan, taktıldi plıtalar, múgedekterge arnalǵan kórsetkishter bar. Men árdaıym bizge jasalǵan jaǵdaılarǵa nazar aýdaramyn. Bul – qala turǵyndary, sonyń ishinde biz úshin de eń jıi baratyn oryndar», - dep ekinshi toptaǵy múgedektigi bar Islam Atakıshıev oıymen bólisti.
Budan basqa, Mańǵystaý oblysy boıynsha halyqty áleýmettik qorǵaý salasyndaǵy retteý jáne baqylaý komıtetiniń departamenti 2025 jyldyń basynan bastap profılaktıkalyq baqylaý sheńberinde 7 jáne jospardan tys baqylaý sheńberinde 15 tekserý júrgizdi. Tekserý qorytyndysy boıynsha anyqtalǵan buzýshylyqtardy joıý týraly 6 nusqama engizilip, 6 nysan ákimshilik jaýapkershilikke tartyldy.
Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde ákimshilik jaýapkershilikke tartpaı, olardy joıý týraly nusqamalar ǵana engiziletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynatyn bolady.
Aıta keteıik, SQO-da múgedektigi bar tulǵalarǵa zańsyz salyq salynǵan.