Mańǵystaý oblysynda 200 myń adamdy aýyzsýmen qamtıtyn sý qubyry paıdalanýǵa beriledi

TÚRKІSTAN. KAZINFORM — Mańǵystaý oblysynda 200 myńnan astam adamdy aýyzsýmen qamtıtyn sý qubyrynyń rekonstrýktsııasy aıaqtalýǵa jaqyn.

Sý qubyrynyń uzyndyǵy – 46 shaqyrym. Ol «Quıylys-Melovoe» ken ornyn «Kaspıı» tuşytý zaýytymen baılanystyrady. Qazir jumystardyń 90%-y oryndalǵan. Nysan 2025 jyldyń qazan aıynda paıdalanýǵa berilmek. Rekonstrýktsııadan keıin táýligine 46 myń tekshe metr sý tuşytý zaýytyna turaqty jetkiziledi. Bul Aqtaý qalasynyń, sondaı-aq Mańǵystaý oblysyndaǵy Munaıly men Qaraqııa aýdandarynyń 200 myńnan astam turǵynyn aýyzsýmen qamtamasyz etýge múmkindik beredi.

– Memleket basshysynyń tapsyrmasy boıynsha batys óńirlerde eldi mekenderdi turaqty aýyzsýmen qamtý jumystary júrgizilip jatyr. Qazir mınıstrlik 2500 shaqyrymnan astam sý qubyryn salyp, rekonstrýktsııalaý jumystaryn júrgizip jatyr. Bul shamamen 1,3 mln adamdy taza aýyzsýmen qamtamasyz etýge múmkindik beredi. Búginde respýblıka boıynsha 9 oblysta 31 joba iske asyrylyp jatyr. Osy jobalardyń nátıjesinde barlyq azamat sapaly aýyzsýǵa qol jetkizedi, – dedi Sý resýrstary jáne ırrıgatsııa vıtse-mınıstri Erbolat Ibraıhanov.

Aıta keteıik, Qostanaıda apatty sý qubyryn kúrdeli jóndeýge daıyndyq júrip jatyr.

Qaraǵandy oblysynda sý qubyry jelilerin salýǵa 5 mlrd teńgeden astam qarajat bólindi.

SQO-da qaıtarylǵan aktıvter esebinen 30 aýylǵa sý qubyry tartylyp jatyr.