Mańǵystaý oblysynda 16 jańa jol salynyp jatyr
ASTANA. KAZINFORM – Mańǵystaý oblysynda jergilikti mańyzdaǵy avtojoldardyń 97%-ynyń jaǵdaıy jaqsy. Oǵan qosa, 491 shaqyrym bolatyn 16 jol salynyp jatyr. Bul týraly óńir ákimi Nurdáýlet Qılybaı aıtyp berdi.
Onyń aıtýynsha, geografııalyq ornalasýyna oraı oblysta kólik qozǵalysynyń barlyq túri (avtomobıl joly, áýe joly, temir jol, sý joly) qalyptasqan.
– 2025-2026 jyldary Mańǵystaý oblysynyń aýmaǵynda respýblıkalyq jáne oblystyq mańyzy bar avtomobıl joldarynda jalpy uzyndyǵy 491 shaqyrymdy qamtıtyn 16 joba boıynsha qurylys jumystary júrip jatyr, - dedi N. Qılybaı elordada Ortalyq kommýnıkatsııalar qyzmetinde.
Sonymen birge, oblystaǵy qoǵamdyq kólik marshrýtynda jańartylǵan avtobýstardyń úlesi – 90%-ǵa jetti. 2021-2025 jyldary 333 jańa avtobýs satyp alynyp, 35 jańa baǵyt ashylǵan.
2026 jyly taǵy 75 avtobýs alynady, sonyń nátıjesinde avtobýs parki 100%-ǵa jańartylady.
Buǵan deıin Nurdáýlet Qılybaı Qazaqstan men Ázerbaıjan arasynda alǵashqy paromdar qatynaı bastaıtynyn aıtqan edi.