Mańǵystaý oblysynda 14 mektep salyndy
ASTANA. KAZINFORM – Mańǵystaý oblysynda úsh aýysymdy mektepter sany azaıdy jáne erekshe qajettiligi bar balalarǵa ońaltý ortalyqtary salynyp jatyr. Bul týraly óńir ákimi Nurdáýlet Qılybaı aıtty.
«Keleshek mektepteri», «Aýyl – El besigi» jobalary aıasynda jáne demeýshilik esebinen oblysta 14 mekteptiń qurylysy men 2 mektepke qosymsha qurylys salynyp, paıdalanýǵa berildi.
Jańaózen qalasynda 350 oryndyq oqýshylarǵa arnalǵan ozyq úlgidegi Bolashaq saraıynyń qurylysy aıaqtaldy, nysan kelesi aıda ashylady.
– Ótken oqý jylynda 3 aýysymda oqıtyn 10 mektep bolsa, bıyl 3 mektep qalyp otyr. Endi óńirdegi úsh aýysym máselesin túpkilikti joıý úshin 9100 orynǵa arnalǵan 8 mekteptiń qurylysyna (Aqtaý, Mańǵystaý aýdany, Jańaózen, Munaıly aýdany) jáne 5 mektepke japsarjaı salý úshin jobalyq-smetalyq qujattama daıyndalýda, - dedi N. Qılybaı elordada Ortalyq kommýnıkatsııalar qyzmetinde.
Oblystaǵy orta bilim sapasy da jaqsaryp keledi. Bıyl 9 731 túlek mektep bitirgen, memlekettik grant ıegerler sany ótken jylmen salystyrǵanda 9%-ǵa ósken.
— Bıyl óńirimizde alǵash ret «Tabysty mektep» konkýrsy ótkizildi. Onyń maqsaty – óńirdegi bilim sapasyn arttyrý jáne pedagogıkalyq ujymdy yntalandyrý. Konkýrs nátıjesinde mekteptiń barlyq qyzmetkerleri (tehnıkalyq qyzmetkerden mektep dırektoryna deıin) syıaqylar aldy, - dedi oblys ákimi.
Erekshe qajettiligi bar balalarǵa jaǵdaı jasaý maqsatynda memlekettik-jekeshelik áriptestik mehanızmi arqyly oblysta 2 balabaqsha qurylysy bastaldy. Beıneý aýylynda alǵash ret erekshe kútimdi qajet etetin balalarǵa arnalǵan ońaltý ortalyǵy ashyldy. Jańa ortalyq jylyny 600 balany qabyldap, ońaltý kýrstaryn uıymdastyra alady.
2026 jyly kámelet jasyna tolmaǵan balalarǵa arnalǵan 100 oryndyq «Aýtızm» ortalyǵy óz jumysyn bastaıdy. Ondaǵy kerekti jabdyqtardyń barlyǵy demeýshilik esebinen alyndy.
Buǵan deıin Nurdáýlet Qılybaı óńirdegi jumyssyzdyq máselesi qalaı sheshilip jatqanyn aıtyp berdi.