Mańǵystaý oblysyna 250 medıtsına mamany jetispeıdi

AQTAÝ. KAZINFORM – Bul týraly oblystyq densaýlyq saqtaý basqarmasynyń basshysy Bekbolat Іzbasarov málimdedi.

Onyń aıtýynsha, aımaqta shamamen 250 dáriger jetispeıdi.

Eń kóp qajet mamandar - terapevt, pedıatr, hırýrg, akýsher-gınekolog, anestezıolog jáne gematolog.

- Máseleni sheshý úshin ótken jyldan bastap, kótermeaqy mólsheri ulǵaıtylǵan. Qazirgi ýaqytta Mańǵystaýǵa kóship kelgen dárigerlerge qarjylaı qoldaý kórsetiledi. Qalada jumys istese - 3 mıllıon teńge, aýdanǵa barsa - 5 mıllıon teńge, aýyldyq jerde eńbek etse - 8,5 mıllıon teńge beriledi, - deıdi basqarma basshysy.

Bıyl osyndaı tólemderdi 60 dáriger alǵan. Endi jyl sońyna deıin mamandar úshin 50 páter satyp alý josparlanyp otyr.

- Bul shara nátıje berip jatyr. Qarjylaı qoldaý - qazirgi ýaqytta basty yntalandyrýshy faktor, - dedi Bekbolat Іzbasarov.

Buǵan deıin, Mańǵystaýda munaı qaldyqtaryn jerge tókken kompanııaǵa qatysty jospardan tys tekserý júrgiziletini týraly jazǵan bolatynbyz.