Mańǵystaý oblysy túıe sútin untaqqa aınaldyryp, eksporttaýdy bastady

ASTANA. KAZINFORM – Mańǵystaý oblysynda túıe sútin qurǵaq untaqqa aınaldyryp, eksportqa shyǵarý úshin 3 iri ınvestıtsııalyq joba júzege asyp jatyr. Bul týraly oblys ákimi Nurdáýlet Qılybaı eseptik kezdesýde aıtty. 

– Óńirde 95 myńǵa jýyq túıe basy tirkelgen. Túıe sútin qurǵaq untaqqa aınaldyryp, eksportqa shyǵarý maqsatynda túıe sútin tereń óńdeýge baǵyttalǵan 3 iri ınvestıtsııalyq jobany iske asyrýdamyz. Jalpy bıyl oblysta aýyl sharýashylyǵy salasynda 38 mlrd teńgege jýyq ónim óndirildi. Onyń ishinde mal sharýashylyǵynda ónim shyǵarý kólemi 22,4%-ǵa kóbeıdi, - dedi N. Qılybaı elordada Ortalyq kommýnıkatsııalar qyzmetinde.

2026 jyly «Qaraǵantúbek» JShS saýyn túıeler sanyn 2000 basqa deıin kóbeıtip, qurǵaq túıe sútin óndiretin zaýyt qurylysyn bastaıdy. Zaýyt jylyna 100 tonnaǵa deıin túıe sútin qaıta óńdeı alady.

– Bıyl oblysta túıe sútin avtomattandyrylǵan ádispen saýatyn tseh ashyldy. Salada 2025-2027 jyldary 23,6 mlrd. teńgeni quraıtyn 15 ınvestıtsııalyq joba iske asyrylady, - dedi oblys ákimi.

Sonymen birge, bıyl 1,3 mlrd teńgege 43 veterınarııalyq pýnkt salynyp, barlyq veterınarııalyq uıymdar qyzmettik avtokólik jáne jabdyqtarmen qamtyldy. Sońǵy jyldary veterınar mamandardyń jalaqysy 100%-ǵa kóterilgen.

Buǵan deıin Mańǵystaý ákimi óńirdiń týrıstik áleýetin baıandap, Bozjyrada alǵashqy qonaqúı qurylysy bastalǵanyn aıtqan edi.