Mańǵystaý oblysy mektepterinde balalar zııandy kontentterge erkin qol jetkizip kelgen

AQTAÝ. KAZINFORM – Beıneý aýdanynyń prokýratýrasy bilim berý mekemelerinde balalardyń qaýipsizdigin qamtamasyz etý salasynda tekserý júrgizdi.

Kompıýterlik synypty tekserý barysynda mektep oqýshylaryna arnalǵan kompıýterlerde ınternet jelisine kedergisiz qol jetimdiligi bar ekendigi anyqtaldy.

«Internet braýzerde izdeý júıesiniń muraǵatynan zııandy, sonyń ishinde býkmekerlik keńseniń paraqshalary tabyldy. Kompıýterlerde „Balalar súzgisi“ sekildi, kúdikti ınternet-resýrstardy kilt sózder arqyly avtomatty túrde anyqtaý jáne buǵattaý baǵdarlamalary ornatylmaǵan.

Anyqtalǵan zańdylyqty buzýshylyqtardy joıý maqsatynda oblystyq bilim salasyndaǵy sapany qamtamasyz etý departamentine qadaǵalaý aktisi engizildi», — dep jazdy Bas prokýratýradan.

Nátıjesinde bilim berý mekemeleriniń 24 dırektory QR ÁQBtK-niń 409-babynyń 7-2-bóligi boıynsha ákimshilik jaýaptylyqqa tartylyp, qaýipti ınternet-resýrstarǵa qoljetimdilik shekteldi, 16 607 oqýshynyń quqyqtary qorǵaldy.