Mańǵystaý oblysy ákiminiń birinshi orynbasary taǵaıyndaldy
ASTANA. KAZINFORM — QR Prezıdenti Ákimshiliginiń kelisimi boıynsha, oblys ákimi Nurdáýlet Qılybaıdyń ókimimen Erbol Іzbergenov Mańǵystaý oblysy ákiminiń birinshi orynbasary bolyp taǵaıyndaldy. Bul týraly Mańǵystaý oblysy ákiminiń baspasóz qyzmeti málim etti.
Erbol Kúreńtaıuly Іzbergenov 1973 jylǵy 11 tamyzda Mańǵystaý oblysy Qaraqııa aýdanynyń Quryq aýylynda dúnıege kelgen.
Eńbek jolyn 1991 jyly «Mańǵystaýmunaıgazbarlaý» keshendi ekspedıtsııasy qurylys-montaj ýchaskesiniń tas qalaýshysy qyzmetinen bastaǵan.
Ár jyldary óńirlik deńgeıdegi qurylys mekemelerinde, Aqtaý qalasy ákimdiginde eńbek etip, Munaıly aýdany ákiminiń orynbasary, oblystyq qurylys basqarmasynyń basshysy qyzmetterin atqardy.
Sondaı-aq QR Investıtsııalar jáne damý mınıstrliginde jáne QR Densaýlyq saqtaý jáne áleýmettik damý mınıstrliginde basqarma basshysy bolyp eńbek etken.
2019-2020 jyldary «Aqtaý teńiz porty» arnaıy ekonomıkalyq aımaq» AQ basqarma tóraǵasynyń orynbasary, keıin «Atameken» respýblıkalyq kásipkerlik palatasynyń dırektory boldy.
2020-2023 jyldary aralyǵynda Aqtaý qalasy ákiminiń orynbasary jáne Aqtaý qalasy ákiminiń laýazymdaryn atqardy.
2024-2025 jyldar aralyǵynda Mańǵystaý oblysy ákiminiń birinshi orynbasary laýazymyn atqardy.
2025 jylǵy 2 qyrkúıekten bastap osy ýaqytqa deıin Mańǵystaý oblysy ákiminiń orynbasary qyzmetin atqaryp keldi.
Aıta keteıik, buǵan deıin QR Prezıdenti Ákimshiliginiń kelisimi boıynsha, oblys ákiminiń ókimimen Ǵalymjan Nııazov Mańǵystaý oblysy ákiminiń orynbasary qyzmetine taǵaıyndalǵan bolatyn.
