Mańǵystaý oblysy ákimdigi men munaı kompanııalary aýyl sharýashylyǵy taýaryn óndirýshilerdi qoldaıdy
ASTANA. KAZINFORM - QR Premer-mınıstriniń orynbasary Tamara Dúısenova Mańǵystaý oblysyna jasaǵan jumys sapary aıasynda Beıneý aýdanyna baryp, «Aýyl amanaty» baǵdarlamasynyń júzege asý barysymen tanysty, dep habarlaıdy Úkimettiń baspasóz qyzmeti.
Aýyl turǵyndarynyń tabysyn arttyrýǵa baǵyttalǵan joba aıasynda aýdan ortalyǵynda tigin sheberhanasy, naýbaıhana, bordaqylaý alańy óz jumysyn bastady. Kásip ıeleri tómen paıyzdyq mólsherlememen nesıe alý arqyly óz isterin ashýǵa múmkindik aldy.
«Baǵdarldama – halyq úshin óte tıimdi. 2,5%-dyq nesıe, óteý tólemin shegerý múmkindigi qarastyrylǵan. Kásip ashýǵa nıettilerge bul taptyrmas múmkindik dep oılaımyn», — deıdi Qozybek Jalǵaspaev.
Sapar aıasynda vıtse-premer aýyl sharýashylyǵy ónimderin óndirýshiler kórmesimen tanysyp, turǵyndarmen kezdesti.
Oblys ortalyǵynda aımaqtaǵy aýdan, aýyl ákimderiniń qatysýymen keńes uıymdastyryldy. Jıyn barysynda azamattardyń tabysyn arttyrýǵa baǵyttalǵan sharalar talqylandy. «AMANAT» partııasynyń hatshysy Eldar Jumaǵazıev «Aýyl amanaty» baǵadarlamasy aıasynda jumysty utymdy júrgizýge qatysty birqatar usynysty ortaǵa saldy. Sharýalar ónimin ótkizý joldaryna basa mán berildi. Óńirde mektepterdegi ashanalardy azyqpen qamtýǵa shamamen 8,2 mlrd teńge jumsalady. Oǵan qajetti ónimderdi jergilikti óndirýshilerdiń ótkizýge qaýqary bar ekeni aıtyldy.
Sondaı-aq keńeste shaǵyn kásip júrgizý jónindegi ózge óńirlerdiń tájirıbeleri de qarastyryldy. Máselen, BQO ákiminiń keńesshisi Aldııar Halelov aımaq ákimdigi men «Karashyǵanaq Petrolıým Opereıtıng B.V.» arasynda jasalǵan memorandým týraly aıtyp ótti. Búginde ekeýara kelisim negizinde sharýalardyń qolymen óndirilgen 1 tonnadaı sary maı, 100 myńnan asa dana jumyrtqa ónimin mekeme satyp alyǵan. Kompanııada 3 myńnan astam adam jumys isteıdi. Qazirde ondaǵy merdiger mekemeler de jergilikti aýyl sharýashylyǵy óndirýshileriniń ónimderine qyzyǵýshylyq tanytqan. Bul taǵy 10 myńdaı qyzmetkerdi azyqpen qamtýǵa qatysty.
Mańǵystaý oblysynyń ákimi Nurdáýlet Qılybaı da jergilikti taýar óndirýshilerdi qoldaý boıynsha osyndaı memorandýmǵa qol qoıdy. Ekinshi jaqtan ózara yntymaqtastyq týraly qujatqa «QazMunaıgaz» UK» AQ Aqtaý qalasyndaǵy ókildigi basqarma tóraǵasynyń orynbasary Qurmanǵazy Esqazıev, «Mańǵystaýmunaıgaz» AQ bas dırektory Murat Mustafaev jáne «Qarajanbasmunaı» AQ bas dırektorynyń orynbasary Rınat Qarajanov qol qoıdy. 3 kompanııada jıyny 37 myńnan asa adam jumys isteıtinin atap ótý qajet.
«Memorandýmǵa qol qoıǵan mekemeler jeńildetilgen nesıe alǵan sharýalar men kooperatıvter ónimderiniń turaqty tutyýshysy bolady dep sanaımyn. Bul Mańǵystaý óńiriniń sharýalary úshin óte jaqsy múmkindik», — dep atap ótti Tamara Dúısenova.
Osyǵan deıin Vıtse-premer Serik Jumanǵarın senbi kúni ınflıatsııa máseleleri boıynsha keńeıtilgen keńes ótkizgeni týraly jazdyq.
