Mańǵystaý munaıshylary kásipodaqtary Prezıdentke úndeý joldady
ASTANA. KAZINFORM — Mańǵystaý oblysynyń bir top munaıshylary Memleket basshysynyń atyna úndeý jarııalady.
«Qurmetti Qazaqstan Respýblıkasynyń Prezıdenti Qasym-Jomart Toqaev jáne Prezıdent ákimshiligi! Qazirgi tańda Mańǵystaýda bolyp jatqan ózgeristerdi kórip otyrmyz. Biz, kásipodaq músheleri men Prezıdent ákimshiligi birlesip burynnan kele jatqan máselelerdi jáne siz aldymyzǵa qoıǵan mindetterdi birtindep sheship kelemiz. Zulym kúshter bizdi bir-birimizge qarsy qoıýǵa tyrysqanymen olardyń qolynan eshteńe kelmeıdi. Óıtkeni biz sizben birgemiz. Biz tek birigip qana myzǵymas qamal bola alamyz. Erteń ósip-órkendegen elde ómir súrý maqsatynda aqyldasyp, keńesip otyrsaq, sheshilmeıtin másele joq dep esepteımiz. Biz Prezıdentimizdi qoldaımyz», — deıdi burǵylaý mekemesiniń kásipodaq tóraǵasy Erjan Qulataev.
Munaıshylar búgin joldanǵan Prezıdent Joldaýyn da sóz etedi.
«Qurmetti Qasym-Jomart Kemeluly, siz búgin Qazaqstan halqynyń ál-aýqatyn arttyrýǵa, otandastarymyzdyń turmys-tirshiligin jeńildetýge baǵyttalǵan kezekti joldaýyńyzdy jarııaladyńyz. Munaıshylar qaýymy osy ýaqytqa deıin de sizdiń tarapyńyzdan kórsetilip jatqan turaqty qoldaýdy sezinip keledi. Biz, Mańǵystaýmunaıgaz munaıshylary sizdiń Mańǵystaý óńirine baılanysty sońǵy sheshimderińiz ben tapsyrmalaryńyzdy tolyq qoldaımyz. Ádiletti Qazaqstan ornatý jumysynyń asa qıyndyǵyn túsine otyryp, árdaıym sizben birge bolatynymyzǵa sendiremiz. Biz birgemiz! Bizge jasaǵan barlyq isterińiz úshin alǵys aıtýǵa ruqsat etińiz», — dep tolyqtyrdy Memleket basshysyna úndeý joldaýshylar.
Osyndaı málimdemeni Ózenmunaıgaz munaıshylary da jasaǵan. Jumysshylardyń jergilikti kásipodaǵy vıdeoúndeýdi munaı-gaz kesheni kásibı merekesimen quttyqtaýdan bastady.
«Assalaýmaǵaleıkým qazaq eli. Qurmetti Qasym-Jomart Kemelulyna jáne Prezıdent apparatyna óńirde bolyp jatqan ózgerister men Jetibaı aýylyndaǵy munaıshylardyń janaıqaıynyń eshqandaı qantógissiz sheshimin tapqanyna alǵys aıtamyz. Aldaǵy ýaqytta da birlesip, aqyldasyp, keńesip otyrsaq máseleler oryn-ornyna keledi dep esepteımiz. Ártúrli saıası kúshter bir-birimizge qarsy aıdap salýǵa tyrysqanymen bizder oǵan jol bermeımiz», — dedi Ózenmunaıgaz jumysshylary.
Jelide Mańǵystaý oblysynda ornalasqan Oil Construction Company qurylysshylarynyń vıdeosy da tarady.
«Bizge jasaǵan barsha jaqsylyǵyńyz úshin alǵys aıtýǵa ruqsat etińiz. Biz QR Prezıdenti Qasym-Jomart Toqaevpen birgemiz!», — degen Oil Construction Company eńbekkerleri.
Qalamqasmunaıgaz kompanııasy ǵımaratynyń aldyna jınalǵan qyzmetkerlerdiń vıdeosy da áleýmettik jelide júr.
«Qurmetti Qasym-Jomart Kemeluly, búgin siz Qazaqstan halqynyń ál-aýqatyn arttyrýǵa baǵyttalǵan kezekti joldaýyńyzdy jarııaladyńyz. Búgingi joldaýda da halyqtyń kókeıinde jatqan birqatar suraqtardy sheshý joly aıqyndalyp otyr. Munaıshy qaýymy osy ýaqytqa deıin sizdiń tarapyńyzdan kórsetilip jatqan turaqty qoldaýdy sezinip keledi. Biz, munaıshylar, sizdiń Mańǵystaý óńirine baılanysty sońǵy sheshimderińiz ben tapsyrmalaryńyzdy tolyq qoldaımyz. Ádiletti Qazaqstandy ornatý jumysynyń asa qıyndyǵyn sezine otyryp, árqashan sizben birge bolamyz dep sendiremiz. Biz birgemiz!» — deıdi úndeý avtorlary.
