Mańǵystaý munaıshylary kásipodaǵynyń jetekshileri QazMunaıGaz basshysymen kezdesti
AQTAÝ. KAZINFORM – «Mańǵystaýlyq jergilikti munaıshylar kásipodaǵy» QB ókilderi Astanada «QazMunaıGaz» UK AQ basshylyǵymen arnaıy kezdesý ótkizdi.
Jylda ótetin dástúrli basqosýǵa QMG basqarma tóraǵasy Maǵzum Myrzaǵalıev bastaǵan basshylyq quram, «Ózenmunaıgaz» AQ bas dırektory Nurdáýlet Qılybaı, «Mańǵystaýlyq jergilikti munaıshylar kásipodaǵy» QB tóraǵasy Bahtııar Bólekbaev pen ózge de kásipodaq ókilderi qatysyp, saladaǵy máseleler tóńireginde áńgime órbitti.
Kezdesýde qos tarap ótken jyldyń óndiristik jáne áleýmettik-ekonomıkalyq qorytyndylaryn shyǵaryp, eńbek ujymdarynda áleýmettik turaqtylyqty saqtaý, eńbek jaǵdaıyn, ónerkásiptik qaýipsizdik pen óndiristik tártipti jaqsartý boıynsha qabyldanyp jatqan sharalar týraly pikir almasqany aıtyldy.
Munaıshylar kásipodaǵy «QazMunaıGaz» UK AQ-nyń Mańǵystaý oblysy men elimizdiń batys óńirlerinde qolǵa alynǵan iri áleýmettik jobalaryna qatysty pikir bildirdi.
Byltyr jeltoqsan aıynda batys óńirde aýyz sý tapshylyǵy máselesin sheshý úshin «QazMunaıGaz» «Astrahan-Mańǵyshlaq» magıstraldy sý qubyryn rekonstrýktsııalaý jáne keńeıtý jobasynyń birinshi kezeńin aıaqtaǵan bolatyn. Bul jumys qubyrdyń sý ótkizý qýatyn táýligine 110 myńnan 170 myń tekshe metrge deıin arttydy.
Sonymen qatar, 2023 jyldyń qyrkúıek aıynda Jańaózen irgesindegi Kendirlide sý tuşytý zaýytynyń qurylysy bastaldy. Ulttyq kompanııa Jańaózende jańa gaz óńdeý zaýytyn salýdy qolǵa alyp, ony 2026 jyly aıaqtaý josparlanyp otyr. Jańa jobalardyń júzege asý kezeńi men nysandar iske qosylǵan kezde ashylatyn jańa jumys oryndary qaladaǵy áleýmettik turaqtylyqqa oń áserin tıgizedi dep kútilip otyr.
Budan ózge, kásipodaq ókilderi eńbekaqy, munaı kásipshiliginde qoldanylatyn jabdyqtardy satyp alý men jańartý, jeke qorǵanys quraldarymen qamtamasyz etý, sharýashylyq-turmystyq keshenderdi salý, jóndeý jáne basqa da máselelerin jaıyn alǵa tartty.
«Ózen ken ornyn ońaltý jobasyna, ony iske asyrý kezindegi negizgi syn-tegeýrinder men tehnologııalyq qıyndyqtarǵa jeke toqtaldy. Sonymen qatar kezdesýde «Ózenmunaıgaz» kompanııasynyń óndiristik jospary men qarjylyq qyzmetiniń nátıjeleri, sondaı-aq elektr qýatymen jabdyqtaý máselesiniń óndiristik protseske áseri taldandy», - dedi «QazMunaıGaz» UK AQ baspasóz qyzmeti.
