Mańǵystaý men Atyraý turǵyndary Túrikmenstanǵa vızasyz barý múmkindigin qashan alady
ASTANA. KAZINFORM – Búgin Májilistiń jalpy otyrysynda Mańǵystaý men Atyraý turǵyndaryna Túrikmenstanǵa vızasyz barý múmkindigin berý máselesi kóterildi.
Senator Murat Qadyrbektiń aıtýynsha, Táýelsizdik alǵan ýaqyttan beri elimizdiń batys óńirlerine Túrikmenstannan 80 myńǵa jýyq qandas kóship keldi. Al búginde eki baýyrlas el arasyndaǵy shekaradan ótý kezinde birqatar qıyndyq týyndap otyrdy. Óıtkeni Qazaqstan azamattary Túrikmenstanǵa vıza arqyly ǵana kire alady.
- Kóptegen adam Túrikmenstanda ata-babalary jerlengen jerge bara almaı jatyr. Osy rette 2001 jyly Qazaqstan men Túrikmenstan arasynda tıisti kelisimge qol qoıylyp, oǵan sáıkes, Túrikmenstan aýmaǵyna vızasyz kirý, shyǵý jáne ýaqytsha bolýǵa tek qana Atyraý men Mańǵystaý oblysynda turaqty turatyn Qazaqstan azamattaryna 5 táýlikten aspaıtyn merzimge ruqsat etilgen bolatyn. Alaıda, 2016 jyly Túrikmenstan tarapynan mundaı múmkindik toqtatyldy. Sol jyldan bastap búginge deıin Qazaqstannyń shekaralas oblystary turǵyndarynyń túrikmen tarapynan ruqsattyń bolmaýyna baılanysty Túrikmenstan aýmaǵyna vızasyz kire almaýyna oraı biraz ótinish kelip tústi, - dedi ol.
Osyǵan oraı senator Syrtqy ister mınıstriniń orynbasary Álibek Qýantyrovtan «Atyraý men Mańǵystaý oblystarynda turaqty turatyn Qazaqstan azamattarynyń Túrikmenstan aýmaǵyna kirýi qandaı sebepterge baılanysty toqtatyldy? Qazirgi ýaqytta eki el arasyndaǵy vızasyz rejımdi qaıta qalpyna keltirý máselesi qandaı kúıde jáne sheshý maqsatynda tıisti sharalar atqarylyp jatyr ma?» dep surady
Saýalǵa jaýap bergen mınıstr orynbasary 2016 jyldan bastap Túrikmenstan tarapy mundaı tájirıbeni doǵarǵanyn rastady.
- Árıne, bizge de aryzdar túsip jatyr. Másele Syrtqy ister mınıstrliginiń baqylaýynda tur. Prezıdentimiz Túrikmenstanǵa barǵanda bul másele kóterildi. Bıyl kóktemde Syrtqy ister mınıstrliginde vızalyq konsýltatsııalar ótkizdik. Tıisti hattamaǵa ózgerister daıyndalyp, túrikmen tarapyna jiberildi. Endi olar ishki memlekettik rásimderdi ótip jatyr. Másele baqylaýymyzda, - dedi Álibek Qýantyrov.
Aıta keteıik, búgin senatorlar Qazaqstan Úkimeti men Túrikmenstan Úkimeti arasyndaǵy ınvestıtsııalardy ózara kótermeleý jáne qorǵaý týraly kelisimdi ratıfıkatsııalady.