Mańǵystaý kreatorlarynyń rekordtyq jetistigi: eki kúnde 33 mln teńgeden astam ónim satyldy
MAŃǴYSTAÝ. KAZINFORM — Astanada Creative Aimaq jobasy aıasynda Qazaq Creative Hub alańynda uıymdastyrylǵan «Mańǵystaý: Tamyr. Talǵam. Kreatıv» atty eki kúndik jármeńke aıaqtaldy. Іs-shara qorytyndysynda 33 mln 260 myń teńgeniń ónimi satyldy.
QR Mádenıet jáne aqparat mınıstrliginiń málimetinshe, jármeńkege Mańǵystaý oblysynyń kreatıvti ındýstrııa salasyndaǵy 40 ókili qatysyp, óz ónimderin kópshilikke tanystyrdy.
Óńirden kelgen qatysýshylar elorda jurtshylyǵyna sándik-qoldanbaly óner buıymdaryn, dızaınerlik toptamalardy, avtorlyq týyndylar men jergilikti óndirýshilerdiń ónimderin usyndy. Kórmege qoıylǵan jumystar óńirdiń mádenı murasy men qolóneriniń erekshelikterin tanytty. Sheberlerdiń eńbekterinde ulttyq dástúr men zamanaýı baǵyt aıryqsha úılesim tapqan.
Eki kún boıy kórme, sán kórsetilimderi, mýzykalyq-poezııalyq qoıylymdar, kontsertter men taqyryptyq sheberlik sabaqtary ótti. Baǵdarlamada Mańǵystaýdyń dástúrli mádenıetin qazirgi shyǵarmashylyq baǵyttarmen sabaqtastyrýǵa mán berildi.
Jármeńkeni 13 myń adam tamashalady. Іs-shara óńirlik brendterdi tanystyrýmen qatar, jańa iskerlik baılanystar ornatýǵa, ónim ótkizý naryǵyn keńeıtýge jáne otandyq óndirýshilerdiń áleýetin kórsetýge múmkindik berdi.
Creative Aimaq jobasy óńirlerdegi kreatorlardy qoldaýǵa, kreatıvti ındýstrııa salasyndaǵy kásipkerlikti damytýǵa jáne Qazaqstan óńirleriniń shyǵarmashylyq áleýetin keńinen tanytýǵa baǵyttalǵan.
