Mańǵystaý, Býrabaı jáne Almatyda týrızm salasy qalaı damıdy

ASTANA. KAZINFORM — QR Týrızm jáne sport mınıstrligi Týrızm ındýstrııasy komıteti tóraǵasynyń mindetin atqarýshy Nurbol Baıjanov eldiń úsh óńirindegi týrıstik sala qalaı damıtynyn túsindirdi.

- Jalpy, týrıstik baǵyt retinde halyqaralyq tanýdyń jáne týrıstik aǵymnyń ulǵaıýynyń arqasynda salanyń ınvestıtsııalyq tartymdylyǵy artyp keledi. Búginde Memleket basshysynyń tapsyrmasyna sáıkes úsh negizgi týrıstik destınatsııany damytý boıynsha jumys iske asyp jatyr. Bul rette Almaty taý klasteri, Şýchınsk-Býrabaı kýrorttyq aımaǵy jáne Mańǵystaý týrıstik aımaǵy qamtylǵan. Joǵaryda atalǵan aýmaqtar úshin ınfraqurylymdy qurý, ınvestıtsııalyq jobalardy iske asyrý, salany ilgeriletý jáne tsıfrlandyrý jónindegi sharalardy qamtıtyn keshendi damý josparlary bekitildi, - dedi N. Baıjanov Ortalyq kommýnıkatsııalar qyzmetindegi baspasóz másıhatynda.

Onyń aıtýynsha, Almaty taý klasterin damytýdyń keshendi jospary aıasynda jumys istep turǵan taý shańǵysy kýrorttaryn keńeıtý jáne olardy biryńǵaı júıege biriktirý josparlanǵan. Nátıjesinde, qosymsha 30 aspaly jol jáne 161 km syrǵanaýǵa arnalǵan joldar paıda bolady. Bul óz kezeginde qazirgi júktemeni azaıtýǵa jáne jyl boıy týrıstik aǵymdy 5 mln adamǵa deıin arttyrýǵa múmkindik beredi. Sheteldik týrısterdiń ósý áleýeti 2029 jylǵa qaraı shamamen 1,7 mln adamdy quraıdy.

- Sonymen qatar, Şýchınsk-Býrabaı kýrorttyq aımaǵyn damytýdyń keshendi josparyna toqtalsaq, Qotyrkól, kishi jáne úlken Shabaqty, Jókeı kólderinde ınfraqurylymdy damytý arqyly Býrabaıdaǵy kólderde júktemeni bólý josparlanǵan. Byltyr Býrabaı kentiniń «Promenad» aımaǵynda uzyndyǵy 10 km velojol salyndy, 8 jańa baıqaý alańy, 4 avtoturaq ashyldy, ekskýrsııalyq tikushaq týry iske qosyldy, - dedi komıtet basshysy.

Kelesi basym baǵyt – Mańǵystaý týrıstik aımaǵy. Osy oraıda «Jyly jaǵajaı» jáne «Kendirli» kýrorttyq aımaqtaryn damytý jáne basqa da biregeı tabıǵı nysandarǵa qoljetimdilikti qamtamasyz etý eskerilgen. 2025 jyly óńirde jalpy somasy 4,6 mlrd teńgege 4 ınvestıtsııalyq joba aıaqtaldy, 110 turaqty jumys orny quryldy. Jalpy, 2029 jylǵa qaraı Keshendi jospardy iske asyrý qonaqúı ınfraqurylymyn keńeıtýge jáne týrıster sanyn taǵy 150 myń adamǵa arttyrýǵa múmkindik beredi.

- Resmı statıstıkaǵa sáıkes 2025 jyly týrızm salasyna ınvestıtsııalar kóleminiń 2024 jylmen salystyrǵanda 33%-ǵa ósýi tirkeldi, bul absolıýtti kórsetkishterde 1 trln 256 mlrd teńgeni qurady (2024 jyly – 948 mlrd teńge), - dedi Nurbol Baıjanov.

Budan buryn habarlanǵandaı, 2025 jyly Qazaqstanǵa týrıst retinde 15,7 mln sheteldik keldi.