Mańǵystaý balyqshylary balyq qabyldaıtyn pýnktiniń joqtyǵyna shaǵymdandy
AQTAÝ. KAZINFORM — Balyq tapsyratyn oryn bolmaǵandyqtan olar ózderine berilgen lımıtti ıgere almaı otyr. Áıtpese teńizde balyq kóp.
Aımaqta balyq aýlaýmen aınalysatyn 200-den astam brıgada, onda 800-ge tarta adam eńbek etedi.
Balyqshylardyń basym bóligi Túpqaraǵan aýdanynda turady.
Bir brıgadaǵa bir kúnde 1 tonna kefal aýlaýǵa ruqsat berilgen. Biraq olar sonsha kólemde aýlaı almaı otyr. Sebebi balyqty tapsyratyn pýnkt joq.
Árkim úıindegi shaǵyn muzdatqyshqa syıǵansha ǵana aýlaıdy.
— Problemamyz sol, bizge jaǵadan muzdatqysh kamera salsa deımin. Balyq óńdeıtin zaýyt dep turǵan joqpyn. Áýeli qabyldaıtyn jer salyp bersinshi. Sol kezde balyqshylardyń bári ózderi úshin soǵan ákelip tapsyrady, — deıdi Fort-Shevchenko qalasynyń turǵyny, balyqshy Mır Joldybaev.
Balyqshylar aýlanǵan jáne óńdelgen balyqqa sýsıdııa bólýdi surady. Sondaı-aq, kefal men shabaqtan ózge de balyqtardy aýlaýǵa ruqsat berse deıdi.
— Sazan, kókserke sııaqty balyqtardy aýlaýǵa ruqsat joq. Keıde aýǵa túsedi. Aýda bir kún jatqasyn ólip qalady. Biz olarǵa aýǵa túspe deı almaımyz ǵoı. Shyǵarsaq jaǵada tekserip, aıyppul salady. Sosyn teńizge tastap ketemiz, — deıdi balyqshy Mır Joldybaev.
Mańǵystaý oblystyq balyq sharýashylyǵy basqarmasynyń basshysy Arman Moldashevtyń aıtýynsha, balyqshylar — jeke kásipkerler, sondyqtan memleket olardyń jumysyna aralasa almaıdy.
— 24 ýchaske 16 tabıǵat paıdalanýshyǵa bekitilgen. Balyqshylar sol 16 sýbektige jumysshy bolyp tirkeldi. Arasynda kelisilgen sharttary bar. Balyqshylar aýlaǵan balyqty osy sýbektiler qabyldaýy qajet, — deıdi basqarma basshysy.
Degenmen balyq sharýashylyǵy basqarmasynyń basshysy Arman Moldashev Túpqaraǵan aýdanyna baryp, balyqshylarmen kezdesip, problemalaryn tyńdap-talqylaıtynyn jetkizdi.
