Mańǵystaý aýrýhanasynyń bas esepshisi 32 mln teńgeden astam qarjyny jymqyrǵany úshin sottaldy
ASTANA. KAZINFORM — Mańǵystaý kóp beıindi oblystyq aýrýhanasynyń bas esepshisi bıýdjet qarajatyn jymqyrǵany úshin 7 jylǵa bas bostandyǵynan aıyryldy. Sondaı-aq oǵan 5 jyl boıy býhgalterlik qyzmetpen aınalysýǵa tyıym salyndy.
Oblys prokýratýrasynyń tekserýi nátıjesinde medıtsınalyq mekemede 32 mln teńgeden astam bıýdjet qarajatyn jymqyrý deregi anyqtalǵan.
Atalǵan fakti boıynsha Qylmystyq kodekstiń 189-baby 4-bóliginiń 2) tarmaǵymen, ıaǵnı asa iri mólsherde senip tapsyrylǵan bóten múlikti ıemdenip alý nemese talan-tarajǵa salý boıynsha qylmystyq is qozǵaldy.
Tergeý málimetinshe, bas esepshi tanysymen aldyn ala sóz baılasyp, bıýdjet qarajatyn jeke kásipkerler men zańdy tulǵalardyń esepshottaryna aýdarǵan. Keıin bul qarajat qolma-qol aqshaǵa aınaldyrylǵan.
Sotta aıyptalýshylardyń kinási tolyq dáleldendi. Bas esepshiniń sybaılasyna 7 jylǵa bas bostandyǵyn shekteý jazasy taǵaıyndaldy.
Sot úkimi zańdy kúshine endi.
Eske salaıyq, munyń aldynda Petropavldaǵy №42 orta mekteptiń býhgalteri men muǵalimi bıýdjet qarajatyn jymqyrǵany úshin 7 jáne 8 jylǵa bas bostandyǵynan aıyrylǵanyn habarlaǵanbyz.
