Mańǵystaýdyń aýylynda 25 jyldan beri asfalt tóselmegen kóshe bar
AQTAÝ. KAZINFORM — Mańǵystaýda Aqshuqyr aýylynda Balsulý Sahıeva kóshesiniń alaqandaı jerine 25 jyldan beri asfalt tóselmeı keledi. Turǵyndardyń aıtýynsha, joldyń joqtyǵynan úılerine jedel-járdem men taksı kelmeıdi.
— Kóshemizge asfalt kerek. Sosyn jaryq kerek. Jol joq bolǵasyn taksı kelmeıdi. Jedel-járdem de joldaryń nashar deıdi. Jańbyr jaýsa, balshyq bolady. Búkil Aqshuqyrda bizdiń kósheden basqasynyń bári asfalttalǵan, — deıdi Aqshuqyr aýylynyń turǵyny Myrzaǵalı Sonabaev.
Atalǵan kósheniń uzyndyǵy 2 shaqyrymdy quraıdy. Sonyń 400 metr jerine asfalt tóselmegen. Turǵyndar soǵan jol salyp berýdi suraıdy.
— Jol joq, onyń ústine jaryq ta joq. Qarańǵy túskende sabaqtan qaıtqan balalarǵa óte qıyn. Aınalada qańǵybas ıt kóp. Ózim súrinip, talaı qulaǵanmyn osy jolda, — deıdi Aqshuqyr aýylynyń turǵyny Bópish Qadirova.
Aqshuqyr aýylynyń ákimi Erkebulan Jánibektiń aıtýynsha, asfalt tóseýge jol boıynda turǵan elektr baǵanalary men aýyz sý qubyrlary júrgizilgen qudyqtar kedergi bolyp tur. Sondyqtan ázirshe qum tógip, joldy tegisteýden basqa amal joq.
— Balsulý Sahıevaǵa úsh kóshe jatady. Sonyń 2-eýi asfalttaldy. Endi myna kóshede qaıta qurylymdaıtyn jumystar bar. Sol úshin bizder jobalyq smetalyq qujattamaǵa usynyp qoıdyq. Jobalyq smetalyq qujattamasy daıyn bolǵanda asfalttaımyz, — deıdi aýyl ákimi.
Aıta keteıik, Aqtaýda prezıdenttiń burynǵy rezıdentsııasynyń ornyna meshit pen stadıon salynatyny anyqtaldy.