Mańǵystaýlyq turǵyn túrki halyqtarynyń 250 jyldyq tarıhy bar ulttyq buıymdaryn saqtaǵan
AQTAÝ. KAZINFORM – Munaıly aýdanynyń turǵyny Aqylberdi Naqov túrki tildes elderdiń ulttyq buıymdaryn jınaýdy 90-jyldary bastaǵan. Búginde alty júzge jýyq kilem men eki júzden astam túrli turmystyq buıymdary bar.
— Ulttyq qundylyqtarǵa degen qyzyǵýshylyǵym bala kúnimnen bar. Otbasynda 14 bala boldyq. Uldiki, qyzdiki demeı úıdiń sharýasyn jasaı beretinbiz. Men kóbinese anam baý-basqur, alasha toqyǵanda janynda bolyp, qolymnyń kúshi bar dep kómektesetinmin. Sodan bolar men salt-dástúr men ulttyq qol óner buıymdaryn sanama sińirip óskenmin. Er jetkende arnaıy saıahatqa shyǵyp, el aralap, adamdarmen kóp aralastym. Sol ulttyń kóne jádigerlerin kórsem surap, satyp alamyn. Keıde úlken kisiler rıza bolyp ózderi berip jiberedi, — deıdi Aqylberdi Naqov.
Aqylberdi Naqov túrki tildes elderde ótetin kilem kórmeleri men qol óner buıymdarynyń jármeńkelerin qalt jibermeıdi. Mysaly, Irandaǵy kórmeden 2 ǵasyr buryn qoldan tigilgen kebeje satyp alǵan. Al, Sın-zıan provıntsııasynan uıǵyrdyń kilimderin ákelipti.
Túrikmenstannan qonys aýdarǵan qandastan bir sharshy metrlik kilemsheni 2 myń dollarǵa satyp alǵan. Búginde qorynda Iran, Túrikmenstan, Ózbekstan, Ázerbaıjan, Daǵystan, Armenııa elderi men uıǵyrlar jáne Mońǵolııadaǵy qazaqtardyń kilemderi bar.
— Qazaqstan boıynsha kilem Qyzylorda óńirinde óndirilgen. Meniń paıymdaýymsha, bul kásip 60-jyldary jaqsy damydy. Aýyl-aýyl bolyp jarysyp, kilem toqyǵan desedi. Odan keıin Shymkentte toqyla bastaǵan, — deıdi kollektsıoner.
Aqylberdi Naqov túrki halyqtarynyń salt-dástúrindegi uqsaqtyqty zerttep, kitap jazýdy josparlaıdy. Sondaı-aq, murajaı ashýǵa daıyndyqty bastap ketken.