«Máńgilik»: Nur-Sultanda qazaq áıelderine arnalǵan mýraldar paıda boldy
NUR-SULTAN. QazAqparat – Taıaýdan beri elordamyzdyń qasbetterinde qala turǵyndarynyń nazaryn aýdaratyn túrli graffıtı men keskindemeler paıda bola bastady. Bul joly sýretteý óneriniń has sheberleri qazaqstandyq áıelderge arnalǵan mýraldy jasap shyǵardy. Keskin «Tse Art Destination» zamanaýı óner galereıasynyń Instagram paraqshasynda jarııalandy, dep habarlaıdy «QazAqparat» HAA tilshisi.
«Máńgilik» atty mýraldyń avtory – Beıbit Ásemqul.
«2020 jyly bizdiń elordanyń qasbetterinde ádette sırek kezdesetin áıelderge keskinin salar ýaqyt keldi. Dástúrli kóshpeliler mádenıetinde áıelderdiń róli erekshe bolǵan. Olar oshaq ıesi bolýmen qatar, el basyna kún týǵanda atqa qonyp, jaýyngerlik qyryn da tanyta bilgen. Kóptegen folklorlyq shyǵarmalarda jaýynger beınesindegi áıelder týraly ańyzdar aıtylady. Bul kóshpeli mádenıettegi áıelderdiń ózin-ózi taný úshin túrli múmkindikterge ıe bolǵandyǵyn dáleldeıdi», - delingen habarlamada.
Joba avtorlarynyń aıtýynsha, shyǵarma jeke tarıhı tulǵaǵa emes, qazaq áıelderine arnalǵan. Keskinde sáýkeledegi jas kelinshek pen kımeshegi uzartylǵan, júzinen danalyq rýhy esken áıel beınelengen. Mıfologııa men mádenıet arqyly sýretshi Beıbit Ásemqul barlyq analar men balalardy qorǵaıtyn Umaı ananyń beınesin jasap shyǵarǵan.
«Bul jumystar «Máńgilik» serııasy boıynsha jasalǵan. Men jobany 2016 jyly oılastyrǵan edim. Ony anama jáne barlyq qazaqstandyq názik jandylarǵa arnadym. Serııa boıynsha monýmentaldy mýral salýdy usyndym. Biz kóbinese erlerdiń tulǵasyna nazar aýdaramyz. Endi áıelderge qurmet kórsetetin kez keldi», - deıdi sýretshi Beıbit Ásemqul.
