Máńgilik El - Táýelsizdiktiń ómirlik fılosofııasy
Bul kún - óz taǵdyrymyzǵa ózimiz qojalyq etip, óz bolashaǵymyzdy ózimiz aıqyndaýǵa qolymyz jetken Uly kún. Tarıhı ádilet saltanat quryp, azattyq úshin tógilgen ólsheýsiz qannyń óteýi qaıtqan Umytylmas kún! San dáýir ótse de urpaqtarymyz ulyqtap ótetin Ulaǵatty kún! Altaı men Atyraýdyń, Syrdarııa men Esildiń arasynda elimizdiń jylnamasy altyn árippen jazylǵan Ardaqty kún!»,- dedi Memleket basshysy Nursultan Nazarbaev «Astana Opera» teatrynda ótken Táýelsizdik kúnine arnalǵan saltanatty jıynda.
Elbasy bizdiń jer betindegi derbes memleket qurýǵa ıe bolǵan 193 ulttyń biri ekenimizdi, sol sebepten táýelsizdiktiń baqytyn baǵalaı bilý qajettigin qadap aıtty. «Basqa baqyttyń qonýy bir bólek, sol baqytty baǵalaı bilý bir bólek. Táýelsiz elderdiń barlyǵy birdeı turaqtylyq pen tatýlyqqa uıyp, damýdyń dańǵylyna túse alǵan joq. Táýelsizdik - tarıhtyń syıy nemese búgingi býynnyń menshigi emes. Ol - ótken babalardyń aldyndaǵy qasıetti borysh jáne keleshek urpaqtyń aldyndaǵy zor jaýapkershilik. Biz Táýelsizdigimizge táý etip, táýbe dep, táýekelmen bolashaqqa bet túzep kelemiz»,- dedi N. Nazarbaev.
Ult kóshbasshysynyń «Máńgilik El» ıdeıasy - táýelsizdigimizdiń tuǵyry. Mundaı paıymmen otandyq sarapshylar da kelisedi. Máselen, Májilis depýtaty Nurtaı Sabılıanovtyń pikirinshe, Qazaqstan halqy óz bolashaǵyn árdaıym Máńgilik Elmen baılanystyrýy kerek. Sebebi, Elbasynyń bul bastamasy - táýelsizdikti nyǵaıtý joly. «Táýelsizdik - bizdiń basty qundylyǵymyz. Al turaqtylyq, birlik jáne tatýlyq saltanat qurǵan qoǵam táýelsizdiktiń tuǵyryn odan ári bekite túsedi» deıdi ol. Sonymen qatar, 1986 jylǵy Jeltoqsan ult-azattyq kóterilisiniń qaharmany Nurtaı Sabılıanov ult múddesine oılaǵan namysshyl jastardyń totalıtarlyq júıege qarsy shyǵýy Táýelsizdikke jol ashyp bergenin aıtady. - 16 jeltoqsan - Qazaqstan táýelsizdigin jarııalaǵan kún. Sondyqtan, bul qasıetti kúndi erekshe atap ótýimiz kerek. Al, 17-18 jeltoqsan - bul kóterilis bolǵan kún. Endeshe, bul kúnderi Jeltoqsan qurbandaryna quran baǵyshtap, olardyń erligine taǵzym etkenimiz jón. Jalpy alǵanda, biz Jeltoqsan qaharmandarynyń erligin búgingi jastardyń boıynda otansúıgishtik, patrıottyq sezimderdi qalyptastyrýǵa úlgi-ónege etip nasıhattaǵanymyz abzal,- deıdi N. Sabılıanov.
Májilis depýtaty, tehnıka ǵylymdarynyń doktory, professor Vıktor Kııanskııdiń aıtýynsha, Táýelsizdik kúni merekesiniń róli men mańyzy aldaǵy ýaqytta arta túsedi. Óıtkeni, uly qundylyǵymyz Máńgilik El ıdeıasynyń negizin salýshy. «Biz eńbektegi erlikterimizdi, eńbek adamdarynyń tabandylyǵyn ulyqtaý arqyly da Táýelsizdik kúniniń mereıin ósire alamyz,- deıdi Vıktor Vladımırovıch. - Eń aldymen, bul kúni Otan aldyndaǵy qasıetti boryshyn adal atqaryp júrgen jaýyngerler, laýazymdy tulǵalar marapattalǵany jón. Ekinshiden, bul merekede elimizdiń jetken tolaıym tabystaryn maqtanyshpen aıtýymyz qajet. Bárinen buryn, Táýelsizdik degenimizdiń ózi ekonomıkalyq, saıası jáne t.b. táýelsizdikterdi nyǵaıtý. Sebebi, órkendegen ónerkásipsiz, alǵa umtylǵan aýyl sharýashylyǵynsyz Táýelsizdik bolmaıdy». V. Kııanskııdiń pikirinshe, jeltoqsan aıyndaǵy eki úlken meıramymyz - Tuńǵysh Prezıdent kúni men Táýelsizdik kúni birin-biri tolyqtyryp turatyn ataýly kúnder. - Bul ekeýi bir-birimen ajyramaıtyn uǵymdar. Sebebi, Táýelsizdiktiń bastaýynda Tuńǵysh Prezıdentimiz, Elbasymyz Nursultan Nazarbaev tur. Ult kóshbasshysy bizdiń damýymyzdyń strategııasy bolyp tabylatyn Táýelsizdigimizdi saqtaý jáne nyǵaıtý jolyndaǵy jaýapkershiligi zor birinshi tulǵa, - deıdi depýtat V. Kııanskıı.
Ámirlan Álimjan.
