«Máńgilik el» poıyzyndaǵy dárigerler aımaqtardaǵy 400-den astam balaǵa ortalyqtan em alý úshin joldama berdi
Bul týraly keshe Shymkent qalasynda toqtaǵan «Máńgilik el» áleýmettik poıyzynyń shtab jetekshisi Á.Álpeıisov pen QR Densaýlyq saqtaý jáne áleýmettik damý mınıstrliginiń basqarma basshysy, úılestirýshi dáriger N.Qydyrbaev OQO Aımaqtyq kommýnıkatsııalar qyzmetinde ótken BAQ ókilderimen kezdesýde málim etti, dep habarlady OQO ákiminiń baspasóz qyzmetinen.
«Beıbitshilik pen kelisimdi tý etken poıyz jolaýshylarynyń quramynda barlyq mınıstrliktiń 100-den asa bilikti mamandary bar bolsa, solardyń 30 shaqtysy áleýmettik salanyń qyzmetkerleri. Jalpy, aktsııa barysynda poıyz 12 oblystaǵy shalǵaı eldi mekenderge toqtalyp, 39 myńnan astam turǵynǵa kómek kórsetken. Elbasynyń bastamasymen qolǵa alynǵa bul sharanyń basty maqsaty - shalǵaıdaǵy aýyldarda Táýelsizdik jyldaryndaǵy elimizdiń jetistikterin qarapaıym halyq arasynda keńinen nasıhattap, memleketimizdiń mereıli merekesin sezindirý bolyp tabylady. Sondaı-aq, shırek ǵasyrlyq azattyq toıyn toılaý arqyly halqymyzdyń áleýmettik máselelerimen tanysý jáne onyń sheshilýine meılinshe yqpal etýge atsalysý» - dedi Á.Álpeıisov.
Baspasóz máslıhatynda sóz alǵan QR Densaýlyq saqtaý jáne áleýmettik damý mınıstrliginiń basqarma basshysy aktsııa barysynda búgingi kúnge deıin poıyz quramyndaǵy dárigerlerdiń 12 myńnan astam azamatqa tegin medıtsınalyq kómek kórsetip, 400-den astam balaǵa
ortalyqtan em alý úshin joldama berilgenin jetkizdi. Aıta keteıik, 15 aqpan kúni Astana qalasynan bastaý alǵan «Máńgilik el» poıyzynyń sońǵy aıaldamasy 18 naýryz kúni Almaty qalasy bolmaq.
