«Máńgilik el» poıyzy 40 myńǵa jýyq halyqqa kómek kórsetti - OQO

ASTANA. QazAqparat - Qazaqstannyń túkpir-túkpirindegi shalǵaı eldi mekenderdi aralap Táýelsizdigimizdiń 25 jyldyǵy men «Máńgilik el» ıdeıasyn nasıhattaý maqsatynda jolǵa shyqqan áleýmettik poıyz búgin Shymkent qalasyna aıaldady.

Shtab jetekshisi Á.Álpeıisov pen QR Densaýlyq saqtaý jáne áleýmettik damý mınıstrliginiń basqarma basshysy, úılestirýshi dáriger N.Qydyrbaevtar OQO Aımaqtyq kommýnıkatsııalar qyzmetinde BAQ ókilderimen kezdesip, sapardyń muratyn túsindirdi, dep habarlaıdy OQO ákiminiń baspasóz qyzmeti.

«Beıbitshilik pen kelisimdi tý etken poıyz jolaýshylarynyń quramynda barlyq mınıstrliktiń 100-den asa bilikti mamandary bar bolsa, solardyń 30 shaqtysy áleýmettik salanyń qyzmetkerleri. Jalpy, aktsııa barysynda poıyz 12 oblystaǵy shalǵaı eldi mekenderge toqtalyp, 39 myńnan astam turǵynǵa kómek kórsetken. Elbasynyń bastamasymen qolǵa alynǵan bul sharanyń basty maqsaty - shalǵaıdaǵy aýyldarda Táýelsizdik jyldaryndaǵy elimizdiń jetistikterin qarapaıym halyq arasynda keńinen nasıhattap, memleketimizdiń mereıli merekesin sezindirý bolyp tabylady. Sondaı-aq, shırek ǵasyrlyq azattyq toıyn toılaý arqyly halqymyzdyń áleýmettik máselelerimen tanysý jáne onyń sheshilýine meılinshe yqpal etýge atsalysý» - dedi Á.Álpeıisov.

Baspasóz máslıhatynda sóz alǵan QR Densaýlyq saqtaý jáne áleýmettik damý mınıstrliginiń basqarma basshysy aktsııa barysynda búgingi kúnge deıin poıyz quramyndaǵy dárigerlerdiń 12 myńnan astam azamatqa tegin medıtsınalyq kómek kórsetip, 400-den astam balaǵa ortalyqtan em alý úshin joldama berilgenin jetkizdi.

Aıta keteıik, 15 aqpan kúni Astana qalasynan bastaý alǵan «Máńgilik el» poıyzynyń sońǵy aıaldamasy 18 naýryz kúni Almaty qalasy bolmaq.