«Máńgilik El» konferentsııasyna 20 elden Qazaq handyǵynyń tarıhyn zerttegen ǵalymdar keledi
Búgin OKQ kelip, konferentsııa týraly aqparat bergen QR BǴM Ǵylym komıteti tóraǵasynyń orynbasary Amandyq Tóleshovtiń aıtýynsha, konferentsııaǵa Qazaq handyǵynyń tarıhyn zerttegen tarıhshylar men ǵalymdar keledi.
«11 qyrkúıek kúni Nazarbaev ýnıversıtetinde «Máńgilik El» atty halyqaralyq ǵylymı-praktıkalyq konferentsııa ótedi. Sharaǵa elimizdiń laýazymdy tulǵalary, úkimet ókilderi, ataqty tarıhshylar qatysady dep kútilýde. Konferentsııanyń mán-maǵynasy men mazmuny aýqymdy bolmaq. Mysaly, konferentsııa aıasynda L.N.Gýmılev atyndaǵy Eýrazııa ulttyq ýnıversıteti «Qazaq handyǵynan Qazaqstan Respýblıkasyna deıin: jańa derekter men jańa tujyrymdamalar» atty sessııa ótizedi. Sondaı-aq, elimizdiń Joǵarǵy soty «Qazaq quqyǵy men bıler sotynyń álem órkenıetindegi orny» degen sessııa uıymdastyrmaq. Jalpy, konferentsııaǵa 1500-den astam adam qatysady. Sonyń ishinde, 20 elden Qazaq handyǵynyń tarıhyn zerttegen ǵalymdar men tarıhshylar shaqyryp otyrmyz», - dep habarlady A.Tólesheov.
Al belgili tarıhshy, BǴM Memlekettik tarıh ınstıtýtynyń dırektory Búrkitbaı Aıaǵan naqtylap ótkendeı, tarıhshylar AQSh-tan, Frantsııa, Italııa elderinen keledi eken.
«Elbasynyń tapsyrmasyna oraı, Úkimet qaýlysymen byltyr osy ýaqytta toılana bastaǵan Qazaq handyǵynyń 550 jyldyq mereıtoıy aıaqtalyp keledi. Biraq, bul zertteý jumystary toqtaıdy degen sóz emes. Mereıtoıdyń qorytyndy sharalary ótedi, biraq, ǵylymı zertteý jumystary jalǵasa beredi. 11 qyrkúıek kúni Astanada ótetin ǵylymı konferentsııanyń mazmuny óte salmaqty. Sebebi oǵan Qazaq handyǵynyń tarıhyn zerttegen, jalpy, qazaq ultynyń tarıhyn bilýge yntyq AQSh, Italııa, Frantsııa, Bashqurstan, Tatarstan jáne basqa da elderdiń ǵalymdary shaqyrylyp otyr», - dep tolyqtyrdy B.Aıaǵan.
