«Máńgi muǵjıza» («Quran shapaǵy») atty kitaptyń tusaýkeseri ótti (FOTO)
ASTANA. QazAqparat - Qazaqstan musylmandary Dinı basqarmasynda ǵulamalardyń kezekti keńes ústinde jaǵymdy jańalyq boldy. Jıyrma bes jyldyq daıyndyǵynan keıin qalamyn qolǵa alyp, Qurannyń alǵashqy para aıattaryn maǵynalyq jaǵynan aýdaryp, soǵan tereń tápsir jazǵan Muhıtdın Isaulynyń «Máńgi muǵjıza» («Quran shapaǵy») atty kitabynyń tusaýkeser rásimi ótti.
Kitaptyń kólemi úlken ári tórt júz betke jýyq. Burynǵy tápsirlerden bul eńbektiń bir ereksheligi - ár bir aıatqa jeke-jeke toqtalyp, keńinen túsinik berilgen, dep habarlaıdy QMDB baspasóz qyzmetinen.
Tusaýkeser rásimin júrgizgen naıb múftı Serikbaı qajy Oraz osy kitapqa erekshe ıltıpatyn bildire otyryp: «Muhıtdın Isauly baýyrmyzdyń «Máńgi muǵjıza (Quran shapaǵy) atty myna birinshi kitaby jaryq kórdi. Bul Quran - sózsiz, Máńgi muǵjıza. Bul jerde tápsir men táýıldiń maǵynalaryn jáne kóptegen termınderge anyqtamalyq berip, súrelerdiń barlyǵynyń tarıhtaryna toqtalǵan. Qurannyń aýdarmasyn, tápsirin jazyp júrgen azamattar bar. Bul jerdegi Muhańnyń ereksheligi Qurannyń muǵjızasyn basqa bir qyrynan áli de kórinbeı jatqan, halyqqa jetkize almaı jatqan jaǵynan aldy dep oılaımyn», - dedi.
Bul Muhıtdın Isaulynyń tápsirge qatysty alǵashqy kitaby edi, alda Qurannyń sońǵy parasyna deıin talaı kitaptar jazylmaq.
Kitapqa zer sala qaraǵan ǵulama músheleri de eńbekke qyzyǵýshylyq tanytyp, áriptesine Alladan medet tiledi.
