Maneza, Podobedova, Chınshanlo jattyǵýlaryn jalǵastyrýda
TALDYQORǴAN. QazAqparat - Maıa Maneza, Zýlfııa Chınshanlo jəne Svetlana Podobedova jattyǵýlaryn jalǵastyrýda. Aldaǵy ýaqytta Podobedova jəne Chınshanlo 2020 jyly ótetin Tokıo olımpıadasynda baqtaryn synaýy múmkin, dep habarlaıdy QazAqparat tilshisi.
Al atalǵan dodaǵa Maıa Maneza qatysady ma, əzirge belgisiz. Búgin bul jóninde Almaty oblystyq dene shynyqtyrý jəne sport basqarmasynyń basshysy Turatbek Sharapıev məlim etti.
"Zýlfııa Chınshanlo jas sportshy. Tokıo olımpıadasyna qatysýy tıis. Mundaı múmkindik Svetlana Podobedovada da bar. Al Maıa Maneza tóńireginde biraz suraqtar týyndaýda. Qazir osy úsheýi naqty sporttan shettetilgen joq. Aýyr atletıkadan Qazaqstan qurama komandasynda jattyǵýlaryn jalǵastyryp jatyr. Ózderińizge belgili, 2018 jyly jazǵy Azııada oıyndary ótedi. Olar osy dodaǵa daıyndyqtaryn shyńdaıdy degen úmittemiz", dedi Sharapıev.
Basqarma basshysynyń sózinshe, halyqaralyq olımpıada komıteti atalǵan sportshylardyń medaldaryn alyp, nátıjelerin joıǵanymen, ziltemirshiler sportpen qoshtaspaıdy. Sebebi, halyqaralyq aýyr atletıka federatsııasy Maıa Maneza, Zýlfııa Chınshanlo jáne Svetlana Podobedovany sporttan shektetý jóninde naqty sheshim shyǵarmaǵan.
Sondaı-aq jıyn barysynda respýblıkalyq jəne halyqaralyq jarystarda joǵary nətıjelerge jetken sportshylarǵa aı saıyn oblys əkiminiń syıaqysy tólenetini aıtyldy. Óńirdiń 60 úzdik jəne 21 múgedek-sportshysy 30 myńnan 300 myńǵa deıin syıaqy alady. Qazir oblys turǵyndarynyń 27 paıyzy ıaǵnı 520 myńnan astam adam júıeli túrde sportpen shuǵyldanýda.
