Mánerlep syrǵanaýshy ıÝ En Ońtústik Koreıada Olımpıada estafetasynyń birinshi alaýgeri boldy
ASTANA. QazAqparat - Sársenbi kúni Koreıa Respýblıkasynda Olımpıada alaýynyń estafetasy bastaldy, birinshi fakel ustaýshy mánerlep syrǵanaýshy ıÝ En boldy.
Estafetanyń resmı bastalýy birneshe saǵat buryn alaý Grekııadan Koreıaǵa jetkennen keıin bastaldy, dep habarlaıdy TASS.
Estafetanyń alǵashqy qatysýshysy mánerlep syrǵanaýshy, 2016 jyly 11 jasynda Koreıa Respýblıkasynyń eresekter chempıonatynda jeńiske jetken ıÝ En boldy. Ol jasynyń kishiligine baılanysty Phenchhanda ótetin olımpıadaǵa qatysa almaıdy, óıtkeni áli 15-ke tolǵan joq.
«Olımpıada alaýyn birinshi bolyp alyp júrý qurmetine ıe bolǵanyma maqtanamyn. Olımpıada oıyndarynda óz elimniń namysyn qorǵaý - meniń armanym, bul maqsatqa jetý úshin men barlyǵyna daıynmyn», - dedi ıÝ En estafeta bastalar aldynda.
Ońtústikkoreıalyq Ulttyq olımpıada komıteti 2018 shaqyrymǵa 7500 júgirýshini iriktep alǵan, olar Koreıa Respýblıkasynyń barlyq buryshynan júgirip ótedi. Al, Olımpıada alaýy barlyq toǵyz provıntsııadan, ortalyqqa qarasty segiz qaladan jáne 151 ýezden ótedi.
Aıta keteıik, 2018 jylǵy Qysqy Olımpıada 9-25 aqpan, Paralımpıada - 9-18 naýryz aralyǵynda ótpekshi.
