Mánerlep syrǵanaýshy Ksenııa Pankratova Baıanaýyldyń sulýlyǵyn kórsetip, jelini taǵy qýantty
ALMATY. QazAqparat – Úlken Almaty kólinde mánerlep syrǵanaýmen tanylǵan almatylyq mánerlep syrǵanaýshy Ksenııa Pankratova bul joly Soltústik Qazaqstan tabıǵatynyń sulýlyǵyn kórsetti. Ol Pavlodar oblysynyń ońtústigindegi Baıanaýyl ulttyq parkiniń aýmaǵynda ornalasqan Jasybaı kólinde syrǵanady, dep habarlaıdy QazAqparat.
Bul joly ol shleıfi uzyn kók kóılekpen mánerlep syrǵanap, jeli qoldanýshylaryn taǵy bir qýantty.
«Soltústik Qazaqstandaǵy Pavlodar mańy – tańǵajaıyp jer. Mindetti túrde jazda taǵy kelemin. Bul bir umytylmas sapar boldy: ádemi tabıǵat, qonaqjaı adamdar jáne telegeı-teńiz jarqyn emotsııa! Bizdiń jumysymyzdy baǵalaısyzdar dep úmittenemin. Búkil álemge What is Kazakhstan-dy birge kórseteıik!» – dep jazdy mánerlep syrǵanaýshy Instagram paraqshasynda.
Onyń aıtýynsha, bul bıylǵy jyldyń eń qıyn túsirilimderiniń biri bolǵan.
«Muzdyń qalyń bolǵanyna qaramastan, kóldiń beti sý. Kóılegimniń etegi ábden sý bolyp, salmaǵy 10 kelige bardy, al qatty soqqan jel meni artqa tartyp, kóılegim tap bir parashıýtke aınaldy. Sóıtip alǵa júrýim qıyndady. Biraq beınerolıktiń sońynda kóılekten shashyraǵan tamshylardy aıtsańyzdarshy, bul – meniń súıikti sátim...», – dedi Ksenııa.
Osy posttyń astynda jeli qoldanýshylary emotsııasyn bólisip, tańdanysyn jasyrmady:
«Wow, it's amazing. Joǵary deńgeıde. Sondaı ádemi. Tańǵajaıyp tabıǵat, ǵajaıyp Ksıýsha. Óte ádemi jer. Keremet» dep jazdy olar.
Jyl basynda Ksenııa Pankratova muz qatqan Qapshaǵaı sý qoımasynda qyzyl kóılekpen syrǵanap , jeli qoldanýshylarynyń kózaıymy bolǵan edi.
Aıta ketý kerek, 2018 jyly jeltoqsanda sportshy, bapker Ksenııa Pankratova Úlken Almaty kólinde mánerlep syrǵanap, kópshiliktiń kóńilinen shyqqan edi.
23 jastaǵy sport sheberine kandıdat, fıgýrıst Ksenııa Pankratova sporttaǵy mansabyn aıaqtaǵanyn aıtty. Qazir ol bapkerlikpen aınalysady.
