Mánerlep syrǵanaýshy Elızabet Tursynbaeva qatysatyn jarys tikeleı efırden kórsetiledi
ASTANA. QazAqparat - «Kazsport» telearnasy Reseıdiń Máskeý qalasynda ótetin mánerlep syrǵanaýdan Gran-prı serııasynyń úshinshi kezeńi - «Rostelecom Cup 2016» jarysyn tikeleı efırde kórsetedi.
Atalǵan halyqaralyq jarysqa qazaqstandyq mánerlep syrǵanaýshy Elızabet Tursynbaeva qatysýdy josparlaýda. Onyń ónerin kórermender «Kazsport» telearnasynda 4 qarasha kúni saǵat 23:25-te jáne 5 qarashada saǵat 22:35-te tamashalaı alady, dep habarlaıdy QazAqparat «Qazaqstan» telearnasynyń Strategııalyq marketıng departamentine silteme jasap.
Eske salar bolsaq, Elızabet byltyr «Skate America-2015» týrnırinde - tórtinshi, «Skate Canada - 2015» básekesinde jetinshi orynǵa ıe bolǵan edi. Sonymen qatar, Tursynbaeva aǵymdaǵy jyly Norvegııanyń Lıllehammer qalasynda ótken jasóspirimder arasyndaǵy Olımpıadanyń qola júldegeri.
«Rostelecom Cup 2016» týrnıri - bul 2016-2017 maýsymnyń mánerlep syrǵanaý boıynsha ISU Gran-prıdiń úshinshi kezeńi. Týrnır uıymdastyrýshysy - ISU qoldaýymen Reseıdiń mánerlep syrǵanaý federatsııasy. Jarys erler men áıelderdiń jekeleı syrǵanaýy, juppen syrǵanaý jáne muzda bıleý kategorııalary boıynsha ótedi.
