Mánerlep syrǵanaýshy Elızabet Tursynbaeva bapkerlikke bet burdy
Elızabet Tursynbaeva 2000 jyly dúnıege kelgen. Buǵan deıin álem chempıonatynyń kúmis júldegeri atansa, elimizdiń úsh dúrkin chempıony boldy. Oǵan qosa jasóspirimder qysqy olımpıadasynyń qola júldesine qol sozdy.
Jaqynda ol áleýmettik jelide óziniń sporttaǵy mansabyn aıaqtaǵany týraly habarlaǵan bolatyn. Ol Qyzylorda qalasynda jýrnalısterge bul jóninde resmı málimdeme jasady.
«Men kishkentaı kezimnen mánerlep syrǵanaýdyń sheberi bolýdy qaladym. Sol jolda barymdy saldym. Úlken jetistikterge de qol jetkizdim. Bul oraıda meni qoldaǵan azamattar az bolǵan joq. Ókinishtisi, densaýlyǵyma baılanysty sporttyq mansabymdy erte aıaqtaýǵa týra keldi. Mundaı sheshim qabyldaý men úshin aýyr soqty. Alda talaı jaqsy jańalyqtar kóp bolady degen úmittemin. Meni qoldaǵan barshańyzǵa alǵys aıtamyn», - dedi Elızabet Tursynbaeva
Sondaı-aq brıfıngide Elızabet Tursynbaevanyń ákesi jáne jeke bapkeri Baıtaq Tursynbaev bul sheshimge baılanysty óz pikirimen bólisti.
«Elızabet mánerlep syrǵanaý sportyna 2005 jyly keldi. Segiz jasynda kóptegen jarystarǵa qatysty. Sondaı-aq, Qazaqstan quramasynda óner kórsetti. Osy aralyqta Elızabet úlken jetistikterge jetti. Alǵa qoıǵan maqsatymyz óte kóp edi. Qysqy olımpıadaǵa qatysýdy josparlaǵan edik. Degenmen densaýlyǵy syr berdi. Oılasa kele osyndaı sheshimge keldik. Árıne mundaı sheshim shyǵarmas buryn kóp oılandyq. Biraq uzaq ýaqyt boıy arqa jaraqatynan tolyq aıyǵa almady. Elızabettiń barsha jankúıerlerine tek alǵys aıtamyz», - dedi Baıtaq Tursynbaev.