Mánerlep syrǵanaýdan Olımpıadaǵa baratyn úshinshi sportshymyz anyqtaldy
ASTANA. QazAqparat - Ońtústik Koreıada ótetin Qysqy Olımpıada oıyndaryna Qazaqstan atynan Elızabet Tursynbaevamen birge Aıza Imambek baratyn boldy, dep habarlaıdy «QazAqparat» HAA tilshisi QR Mádenıet jáne sport mınıstrligi Sport jáne dene shynyqtyrý isteri komıtetiniń baspasóz hatshysy Raýhan Toǵymbaevaǵa silteme jasap.
Qyzdar arasynda Elızabetpen birge Olımpıadada óner kórsetetin sportshyny anyqtaý úshin Astanada Qazaqstan chempıonaty ótken bolatyn.
Oqyrmannyń esinde bolsa, Helsınkıde ótken álem chempıonatynda Elızabet Tursynbaeva 9-oryn alyp, Qazaqstannyń qorjynyna Olımpıadanyń eki birdeı joldamasyn alyp bergen edi. Tartysty chempıonatta Aıza negizgi úmitker Jansaıa Ádihanovadan basym túsip, Qysqy Olımpıadada el namysyn qorǵaıtyn eki mánerlep syrǵanaýshynyń biri bolyp otyr.
Eske sala ketsek, 2018 jyldyń aqpan aıynyń 9-25 aqpany aralyǵynda Ońtústik Koreıanyń Phenchhan qalasynda XXIII Qysqy Olımpıada oıyndary ótedi. Olımpıada oıyndaryna 84 memlekettiń sportshylary qysqy sporttyń 15 túrinen ózara baq synaspaq.
Foto www.tulup.ru
