Mánerlep syrǵanaýdan Qazaqstan sportshysy Denıs Ten 7-Qysqy Azııa oıyndarynyń chempıony boldy

Jarystar búgin keshqurym Astanadaǵy Respýblıkalyq velotrekte ótti. Aq Azıadanyń medaldary úshin baq talastyrǵan 14 sportshy óner kórsetýlerin keshe, 4 aqpan kúni qysqa baǵdarlamadan bastaǵan bolatyn.

Jerlesimiz D.Ten keshe de úzdik óner kórsetip, týrnırlik kesteniń birinshi ornyna ornalasqan edi. 17 jastaǵy jas sportshymyz búgin kúrdeli element jasaý barysynda qulap qalyp, jalpy upaıynan 1,00 ball joǵaltqanymen, tehnıkasy úshin - 64,23, sheberligi úshin - 69,44 upaı jınap (barlyǵy 208,89 upaı) altyn medal ıegeri atandy.

Tehnıkasy úshin tóreshilerden - 71,66, sheberligi úshin - 67,44, upaı jınap, otandasymyzdan 2,01 upaı artta qalǵan japondyq Mýra Takahıto kúmis medaldy ıelendi.

Eki kúngi jarys nátıjesi boıynsha 201,10 upaı (tehnıkasyna - 70,72, şeberligine - 63,84 upaı) enshilegen qytaılyq Son Nan «qolaǵa» ıe boldy.

Jarys alańyna shyqqan ekinshi qazaqstandyq sportshy 18 jastaǵy Abzal Raqymǵalıev básekeniń birinshi kúninde kesteniń altynshy ornyna ornalasqan bolsa, búgin ol tóreshilerden tehnıkasy úshin - 57,82, sheberligi úshin - 57,56 upaı, eki kúnniń jalpy nátıjesi boıynsha 170,81 upaı alyp, jetinshi oryndy mise tutty.

Aıta keteıik, erteń 5 aqpan kúni atalmysh sport nysanynda mánerlep syrǵanaýdan medaldardyń úsh jıyntyǵy sarapqa salynady. Atap aıtqanda - áıelder arasyndaǵy erkin baǵdarlama, juppen erkin baǵdarlama jáne juppen erkin bı.