Manekenniń saý jeri qalmady: sot-medıtsınalyq sarapshy Nuraı Serikbaıdyń 35 jaraqatyn kórsetti
ShYMKENT. KAZINFORM — Sot otyrysyndaǵy eń aýyr epızodtardyń biri — Nuraı Serikbaıdyń máıitin zerttegen sot-medıtsınalyq sarapshy Janbolat Pernebekovten jaýap alyndy.
Jábirlenýshi taraptyń ótinishi boıynsha sot zalyna aldyn ala anatomııalyq maneken jetkizildi. Qyzdyń týystary buǵan deıin sotta Nuraıdyń denesine qatysty fotosýretter kórsetilmeýin jáne olardy BAQ-ta taratpaý týraly ótinish bildirgen. Sondyqtan sarapshy jaraqattardyń ornalasýyn arnaıy maket arqyly kórsetti.
Janbolat Pernebekov Nuraı Serikbaıdyń denesine sot-medıtsınalyq saraptamany ózi júrgizgenin rastady.
Onyń aıtýynsha, ólim kóptegen kesip-tilingen jaraqat saldarynan bolǵan. Jaraqattar ishki aǵzalardy zaqymdap, kóp mólsherde qan ketken.
— Denesinde moıyn, keýde qýysy, ish jáne bet aımaqtarynda kóptegen pyshaq jaraqaty anyqtaldy. Keıbir jaraqattar ishki aǵzalarǵa ótken. Dál osy ishki aǵzalardyń zaqymdanýy men keıingi qan joǵaltý ólimge sebep boldy, — dedi sarapshy.
Jábirlenýshi tarap advokatynyń suraqtaryna jaýap bergen sarapshy naqty qaı jaraqat ólimge tikeleı sebep bolǵanyn anyqtaý múmkin emes ekenin aıtty.
— Jaraqat sany óte kóp ári olar qysqa ýaqyt ishinde salynǵan. Sondyqtan qaısysy ólimniń tikeleı sebebi bolǵanyn anyqtaý múmkin emes. Keıbir soqqylar joǵarydan tómen qaraı, keıbiri basqa baǵyttarda jasalǵan. Jaraqattar deneniń ártúrli bólikterinde — aldyńǵy, artqy jaǵynda, moıyn men qol aımaqtarynda ornalasqan. Bul shabýyl kezinde jábirlenýshiniń dene qalpy ózgergenin kórsetedi, — dedi ol.
Odan keıin Pernebekov anatomııalyq manekenge jaqyndap, saraptama qorytyndysynda kórsetilgen barlyq jaraqatty birtindep markermen belgileı bastady.
Ol betki jaraqattardy qara túspen, al keýde jáne qursaq qýysyna ótken jaraqattardy qyzyl túspen belgiledi.
Sarapshy ár jaraqatty manekenge belgilegen saıyn onyń betinde qara jáne qyzyl tústi izder kóbeıe tústi. Nátıjesinde makettiń aldyńǵy bóliginde saý jeri qalmady.
Jaýap alý barysynda sarapshy toǵyz tereń jaraqattyń árqaısysy jeke alǵanda da ómirge qaýip tóndiretinin rastady.
— Osyndaı bir jaraqattyń ózi ólimge ákelýi múmkin edi. Keýde nemese qursaq qýysyna ótip, ishki aǵzalardy zaqymdap, kóp mólsherde qan joǵaltýǵa sebep bolǵan mundaı jaraqattar ómirge qaýipti sanalady, — dep túsindirdi sot-medıtsınalyq sarapshy.
Ol sondaı-aq jaraqattanǵannan keıin ólim birneshe mınýt ishinde bolýy múmkin ekenin, alaıda jaraqat sanynyń kóptigi men qan ketý sıpatyna baılanysty naqty ýaqytty anyqtaý múmkin emes ekenin aıtty.
Sonymen qatar sarapshy marqumda kóp qan joǵaltýdan týyndaıtyn gemorragııalyq shok bolǵanyn rastady. Onyń aıtýynsha, jaraqattyq shok kezinde adam aýyrsynýdy ishinara sezbeýi múmkin.
Kelesi sot otyrysy 11 tamyzǵa belgilendi. Sotta sot-medıtsınalyq sarapshylardan jaýap alý jalǵasady. Odan keıin taraptar sot jaryssózine kóshedi.
Eske sala keteıik, 7 tamyzda Shymkent qalasynyń qylmystyq ister jónindegi mamandandyrylǵan aýdanaralyq sotynda 21 jastaǵy Nuraı Serikbaıdy asa qatygezdikpen óltirý isi boıynsha besinshi sot otyrysy aıaqtaldy. Sherhan Aımahanǵa QR Qylmystyq kodeksiniń úsh baby boıynsha, onyń ishinde ańdý, asa qatygezdikpen jasalǵan adam óltirý jáne nekege turýǵa májbúrleý boıynsha aıyp taǵylyp otyr.
Jábirlenýshi tarap azamattyq talap aryz berdi. Nuraıdyń otbasy moraldyq zııan úshin 10 mlrd teńge jáne materıaldyq shyǵyn retinde 14 mln 739 myń 65 teńge óndirýdi surady. Sondaı-aq talapty qamtamasyz etý maqsatynda sottalýshynyń múlkine tyıym salý týraly ótinish berildi.
Otbasy ókilderiniń aıtýynsha, eger talap qanaǵattandyrylsa, moraldyq zııandy óteý retinde óndiriletin qarajat tolyqtaı qaıyrymdylyqqa jumsalady.
