Mańdaıynda jalǵyz kózi bar qozy týdy
TALDYQORǴAN. QazAqparat - Mańdaıynda jalǵyz kózi bar qozy týdy. Qazir erekshe jaratylysta týǵan tól túsirilgen vıdeo vatsap jelisi arqyly keńinen taralyp jatyr, dep habarlaıdy QazAqparat tilshisi.
Qazaqstandyqtardyń tańdanysyn týdyrǵan qozynyń naqty qaı jerde, qaı ýaqytta týǵany belgisiz. Belgilisi, beınejazbadaǵy kóriniste er azamattar qazaqsha sóılesedi. Soǵan qaraǵanda bul jaıt elimizde bolýy ábden múmkin.
Al Taldyqorǵanda asyl tuqymdy qoı ósiretin sharýashylyq ıesi, aýyl sharýashylyǵynyń sarapshysy Almasbek Sadyrbaev tabıǵatta mundaı jaıttyń bolyp turatynyn aıtty. Onyń sózinshe, bul mýtatsııa.
"Embrıon qoıdyń jatyrynda jatqan kezde, oǵan áser etetin faktorlar bolady. Onyń sebepteri, syrtqy atmosferalyq temperatýranyń kúrt tómendeýi, ne joǵarylaýy. Osyndaı sebepterden aýytqý bolady. Nemese enesiniń jatyrynda jatqan kezde soqqy tııýi múmkin", - deıdi A. Sadyrbaev.
Sondaı-aq ol, mundaı tólderdiń ósimtal bolmaıtynyn alǵa tartýda. Demek, biraz ýaqyttan keıin mal tóli ólip qalady.
Al ańyzdarda bir kózdi qubyjyqtardyń bolǵany jıi aıtylady. Olardy "Tsıklop" dep ataǵan.
