Manchesterdegi lańkestiń tulǵasy anyqtaldy

LONDON. QazAqparat - Ulybrıtanııanyń premer-mınıstri Tereza Meı polıtsııa «Manchester Arenasynda» jarylǵysh zatty iske qosqan lańkestiń tulǵasyn anyqtaǵandyǵyn aıtty, dep habarlaıdy «QazAqparat» HAA-nyń menshikti tilshisi.

«Polıtsııa men qaýipsizdik qyzmeti jankeshtiniń tulǵasyn anyqtady, alaıda  is boıynsha tergeýdiń júrip jatýyna baılanysty onyń atyn ataı almaımyz», - dedi Premer-mınıstr. Ol bul týraly jýrnalısterge aıtyp berdi.

Onyń aıtýynsha, polıtsııa men arnaıy qyzmet shabýyldy bir adam jasaǵanyna senimdi, endigi kezekte arnaıy qyzmet ol jalǵyz nemese lańkestik top quramynda áreket etti me sony anyqtaýy kerek

«Biz stadıonnyń shyǵa beristeriniń birinde ózdiginen iske qosylatyn jarylǵysh zatty iske qosqan bir lańkes ekenin bilemiz. Ol áýel bastan kóp adamdy óltirýdi maqsat etken», - dep atap ótti brıtandyq premer.

Tereza Meı «Manchester» stadıonyndaǵy lańkestik saldarynan 22 adamnyń opat bolyp, shamamen 59 qarapaıym turǵyndardyń jaraqat alǵanyn, kópshiliginiń jaǵdaıy aýyr ekenin rastady. «Qaza tapqandar men jaralanǵandar arasynda balalar men jastar kóp», - dedi ol.

Eske sala keteıik, Manchesterdegi jarylys jaýapkershiligin DAISh terrorıstik uıymy (Qazaqstanda tyıym salynǵan) moınyna alǵan bolatyn.