Manchesterde oqýshylardyń agressıvti minez-qulqyna baılanysty muǵalimder 9 kúndik ereýilge shyqty
ASTANA. KAZINFORM — Manchester qalasyndaǵy mektepterde muǵalimder oqýshylardyń agressıvti minez-qulqy men mektep ákimshiliginiń tıisti shara qoldanbaýyna baılanysty ereýil jarııalady. Bul týraly Kazinform agenttiginiń menshikti tilshisi habarlady.
Ulybrıtanııanyń Manchesteri qalasyndaǵy Lily Lane Primary School jáne Ravensfield Primary School bastaýysh mektepterinde jumys isteıtin NASUWT muǵalimder kásipodaǵynyń músheleri toǵyz kúndik ereýil ótkizip jatyr. Muǵalimderdiń aıtýynsha, ereýildiń sebebi — oqýshylar tarapynan únemi baıqalatyn agressııa jáne mektep basshylyǵynyń tıimsiz áreketteri.
Lily Lane Primary School mektebindegi muǵalimderdiń aıtýynsha, qyzmetkerler men oqýshylarǵa kúsh kórsetý jaǵdaılary kúndelikti bolyp turady. Sonymen qatar, mektep ákimshiligi agressıvti minez-qulyqqa qarsy naqty júıe ornata almaı otyr: tártip erejeleri joq nemese ony durys qoldanbaıdy.
Muǵalimderdi ásirese erekshe qajettilikteri bar oqýshylardyń jaǵdaıy alańdatady. Bul — kúrdeli minez-qulyq, emotsııalyq nemese psıhıkalyq buzylystary bar balalar, olarǵa jeke kózqaras, mamandardyń qoldaýy men qosymsha resýrstar qajet. Degenmen, muǵalimder atap ótkendeı, mektep mundaı jaǵdaılardy qamtamasyz etpeı otyr.
Kásipodaq ókilderiniń aıtýynsha, muǵalimder synyptaǵy agressııa máselesimen betpe-bet qalyp otyr. Ashyq aıtyp, ózgeristerdi talap etken muǵalimderge basshylyq qysym kórsetken — olar qyzmetten shettetilgen nemese eńbek kelisimsharttary uzartylmaǵan.
Ravensfield Primary School mektebinde de osyndaı máseleler bar. Muǵalimderdiń aıtýynsha, oqýshylar qyzmetkerlerge tis, qol, aıaqpen zaqym keltiredi, silekeı shashady, jıhaz laqtyrady, keı jaǵdaılarda tipti mektepke pyshaq ákelgen.
Oqýshylardyń agressıvti minez-qulqy keıde sabaqtyń toqtatylýyna ákeledi. Keıde balalar mekteptiń joǵarǵy qabattaryna shyǵyp ketip, sabaq kezinde erkin júredi. Muǵalimder ákimshiliktiń áreketi tek órtke qarsy esikterdi jabýmen shekteledi dep syn aıtty.
Mektep táýekelderdi baǵalamaıdy, qyzmetkerler men oqýshylardy qorǵaýǵa naqty shara qoldanbaıdy, al muǵalimder esh qoldaý kórmeı otyr.
Eske salsaq, buǵan deıin Túrkııa Ulttyq bilim mınıstrligi muǵalimderdiń áleýmettik jelidegi áreketterine baqylaýdy kúsheıtti degen habar taraǵan edi.
