Manchesterde bolǵan jarylystan qaza tapqandar sany 20-ǵa jetti
ASTANA. QazAqparat - Manchesterdegi qalalyq jabyq stadıon alańynda bolǵan jarylystan jıyrma adam qaza taýyp, júzdegen adam zardap shekti, dep habarlaıdy TASS agenttigi.
Jarylys bıletter satylatyn dálizde bolǵan. Qazirgi ýaqytta oqıǵa ornynda arnaıy mamandar jumys júrgizýde.
Aıta keteıik, amerıkalyq ánshi Arıana Grandeniń kontserti ótken «Manchester-Arena» stadıonynda eki dúrkin jarylys boldy.
Stadıonǵa 21 myń adam sııady. Kýágerlerdiń aıtýynsha, jarylys kontsert aıaqtalyp, kórermender alańnan shyǵyp ketkennen keıin bolǵan.
«Arıana Grande sońǵy ánin oryndap, sahnadan túsip ketti. Sol sátte qatty jarylystyń daýysy shyqty. Myńdaǵan adamnyń alańnan shyǵýǵa talpynyp, aıqaılap jylaǵan daýysy estildi», - deıdi oqıǵa kýágeri Daily Mail basylymyna bergen suhbatynda.
