«Manchester Sıtı» 2 maýsymǵa eýrokýbok oıyndarynan shettetildi
NUR-SULTAN. QazAqparat – Eýropalyq fýtbol qaýymdastyqtary odaǵy (ÝEFA) «Manchester Sıtıdi» eki maýsymǵa eýrokýboktarǵa qatysýdan shektedi. Sanktsııa aldaǵy 2020/21 maýsymynan kúshine enedi, dep habarlaıdy QazAqparat ÝEFA saıtyna silteme jasap.
ÝEFA klýbtarynyń Qarjylyq baqylaý organynyń táýelsiz Sot palatasy barlyq dálelderdi zerdeleı kele, «Manchester Sıtı» fýtbol klýby lıtsenzııalaý erejelerin óreskel buzǵanyn jáne 2012 jáne 2016 jyldarǵy esepterinde demeýshilik tabystaryn asyra kórsetkenin anyqtaǵan.
Osyǵan oraı, Sot palatasy aǵylshyn klýbyn ÝEFA-nyń 2020/21 jáne 2021/22 jyldarǵy eki maýsymynan shettetýdi uıǵardy. Sondaı-aq 30 mln eýro aıyppul saldy.
Atap ótilgendeı, «Manchester Sıtı» bul sheshimge qatysty shaǵymmen Sporttyq tórelik sotyna júginýge quqyly.
Aıta keteıik, aǵylshyn klýby 2019/20-Chempıondar lıgasynyń 1/8 kezeńinde «Realmen» kezdesetin bolady. Ótken maýsymda Hosep Gvardıolanyń komandasy ¼ fınalyna deıin jetip, eki oıynnyń qorytyndysymen «Tottenhemge» jol berdi.
