Manchester sınagogasynadaǵy shabýyl: kem degende eki adam qaza tapty

ASTANA.KAZINFORM - Manchester polıtsııasy 2 qazan kúni tańerteń Hıton-Park sınagogasynda bolǵan shabýyldyń mán-jaıyn anyqtady, dep habarlaıdy Bild. 

Shabýyldan eki adam qaza tapty, taǵy úsheýiniń jaǵdaıy aýyr. Brıtanııalyq aqparat quraldarynyń habarlaýynsha, jaraqat alǵandardyń arasynda kúzetshi de bar.

Esterińizge sala keteıik, beısenbi kúni tańerteń Manchesterde kólik Hıton Park sınagogasynyń mańynda bir top adamdy qaǵyp ketken bolatyn. Odan keıin júrgizýshi pyshaqpen sekirip shyǵyp, qasyndaǵylardyń birin jaralady.

Kýágerlerdiń aıtýynsha, shabýyldaýshy sınagogaǵa kirmek bolǵan, biraq ony kirgizbegen. Qarýly polıtsııa qyzmetkerleri kóp uzamaı oq jaýdyryp, kúdiktini jaralady.

Ulybrıtanııa premer-mınıstri Kır Starmer shabýyldyń «qaýipti» ekenin aıtty. Sebebi ol evreılerdiń eń mańyzdy merekesi Iom Kıpýr kúni boldy.

Starmer Kopengagendegi EO sammıti aıaqtalmastan qaıtyp, Londonda daǵdarys kabınetiniń tótenshe otyrysyn ótkizdi.

Manchester polıtsııasy Plato hattamasyn engizdi, bul qarý qoldanylǵan lańkestik shabýylǵa arnalǵan belgi. Tergeý jalǵasyp jatyr, al sınagoganyń aınalasy qorshaýǵa alyndy.