Manash Qozybaevtyń 7 tomdyq shyǵarmalar jınaǵy jaryq kórdi
ALMATY. 27 jeltoqsan. QazAqparat - Búgin Almatyda «Qazaq entsıklopedııasy» baspasynan jaryq kórgen Manash Qozybaevtyń 7 tomdyq shyǵarmalar jınaǵynyń tanystyrylymy ótti.
Baspanyń bas redaktory Baýyrjan Jaqyptyń aıtýynsha, QR UǴA akademıgi, Qazaqstan ǵylymyna eńbek sińirgen qaıratker, Shoqan Ýálıhanov atyndaǵy syılyqtyń ıegeri, Memlekettik syılyqtyń, QR Prezıdentiniń Beıbitshilik jáne ultaralyq kelisim syılyǵynyń laýreaty Manash Qabashulynyń bul jınaǵy Sh. Ýálıhanov atyndaǵy tarıh jáne etnologııa ınstıtýtynyń usynysymen, Mádenıet jáne aqparat mınıstrliginiń qarjylandyrýymen shyǵarylyp otyr. Onyń alǵashqy tomyna «Maıdanger stýdentter», «Aqtańdaqtar aqıqaty» kitaptary jınaqtalǵan. 2-3 tomyna ǵalymnyń táýelsizdik jyldary jazyp qaldyrǵan «Tarıh zerdesi» monografııasy, 4-tomǵa «Órkenıet jáne ult» kitaby engen. 5-6 tomdarǵa gazet-jýrnaldarda jaryq kórgen materıaldary, radıolarda sóılegen sózderi, suhbattary, jeke tulǵalar týraly pikirleri men maqalalary berilip otyr. Al 7-tomǵa asa iri tarıhshy ǵalymnyń zamandastary týraly pikirleri toptastyrylǵan.
«Jınaqty shyǵarý kezinde M.Qozybaevtyń qazaq tarıhyna qatysty qamtymaǵan taqyryby joq ekenine kóz jetkizdik. Oǵan erte zamandaǵy qazaq tarıhynan bastap táýelsizdik kezeńine deıingi aqtańdaqtar týraly qundy eńbekteri engizildi. Ol «Goloşekın jáne Qazaqstan», «Stalın jáne Qazaqstan», «Hrýshev jáne Qazaqstan», «Brejnev jáne Qazaqstan» degen sııaqty maqalalarynyń atynan-aq kórinip tur», - deıdi QR UǴA múshe-korrespondenti, fılologııa ǵylymdarynyń doktory Baýyrjan Jaqyp.
