Mamyrdyń sońyna deıin elimizde koronavırýs juqtyrǵandar sany 4 myńǵa jetýi múmkin - Esmaǵambetova

NUR-SULTAN. QazAqparat – Qazaqstannyń bas memlekettik sanıtar dárigeri Aıjan Esmaǵambetova Qazaqstanda aldaǵy aıda koronavırýs juqtyrǵan adam sany qanshaǵa deıin jetýi múmkin ekenin málim etti, dep habarlaıdy QazAqparat tilshisi.

«Qazirgi tańda Qazaqstan epıdemııanyń órshý kezeńinde tur. Juqtyrý deńgeıi 8 paıyzdy qurap otyr. Áıtse de aýrýdyń órshýin, sharyqtaý shegi men tómendeýin naýryz, sáýir jáne mamyr aılarynda ótkeremiz. Boljam boıynsha sáýir aıynyń sońyna deıin 2700 adamǵa deıin koronavırýs juqtyrýy múmkin. Mamyr aıynyń sońyna deıin 4 myńǵa jýyq adam indetke shaldyǵýy yqtımal», - dedi Aıjan Esmaǵambetova OKQ-da onlaın rejımde ótken baspasóz máslıhatynda.

Aıta ketsek, buǵan deıin Aıjan Esmaǵambetova osy ýaqytqa deıin Qazaqstanda koronavırýs juqtyrǵandarmen baılanysta bolǵan 40 myńǵa jýyq azamattyń anyqtalǵanyn málim etken edi.