Mamyrdyń 14-15-i kúnderi Almaty qalasynda «EQYU-nyń eýrazııalyq ólshemi» atty Transazııalyq parlamenttik forým ótedi
ASTANA. Mamyrdyń 13-i. QazAqparat - Erteń, mamyrdyń 14-i kúni, Almaty qalasynda QR Parlamenti Májilisiniń Tóraǵasy Oral Muhamedjanov bastaǵan delegatsııa «EQYU-nyń eýrazııalyq ólshemi» atty Transazııalyq parlamenttik forýmnyń jumysyna qatysady,
dep habarlaıdy QazAqparat.
Parlamentaralyq yntymaqtastyqtyń aıasyn keńeıtý maqsatyn kózdeıtin bul forým Qazaqstannyń Eýropadaǵy Qaýipsizdik jáne Yntymaqtastyq Uıymyna tóraǵalyq etýi sheńberinde mamyrdyń 14-i men 16-sy aralyǵynda ótkeli tur.
Transazııalyq parlamenttik forýmnyń ashylý saltanatynda Qazaqstan Respýblıkasynyń Prezıdenti Nursultan Nazarbaevtyń úndeýin EQYU-nyń qazirgi tóraǵasy, QR Memlekettik hatshysy - Syrtqy ister mınıstri Qanat Saýdabaev oqyp beretini qarastyrylǵan. QR Parlamenti Senatynyń Tóraǵasy Qasym-Jomart Toqaevtyń jáne QR Parlamenti Májilisiniń Tóraǵasy Oral Muhamedjanovtyń quttyqtaý sózi josparlanǵan. EQYU-nyń Parlamenttik Assambleıasynyń Tóraǵasy Joa Soareshtyń jáne EQYU-nyń Bas hatshysy Mark Perren de Brıshambo sóz sóıleıtini kózdelýde.
Forým baǵdarlamasynda úsh sessııanyń jumys isteıtini josparlanǵan. Birinshi - «Aımaqtyq qaýipsizdik. Aýǵanstan, terrorızm jáne esirtki zattarymen kúres, qarýsyzdaný». Ekinshi - «Eýrazııa: Damýshy naryqtar jáne óris alǵan shaqyrýlar. Ekonomıkalyq damý, saýda, resýrstardy basqarý, eńbek kóshi-qony, ekologııalyq máseleler». Jáne úshinshi - «Adamzattyq ólshem. Dinı tózimdilik, saıası damý, adam saýdasymen kúres, genderlik teńdik».
Forým jumysyna EQYU-ǵa múshe memleketter, Jerorta teńizi aımaǵy men Azııadaǵy seriktes memleketter parlamentshiler men halyqaralyq uıymdardyń ókilderi qatysady dep kútilýde.
Al mamyrdyń 15-i, senbi kúni, Qyrǵyzstandaǵy jaǵdaıǵa baılanysty arnaıy sessııa ótpekshi (saǵat 15-00). Baıandamashylardyń qatarynda Eýropadaǵy Qaýipsizdik jáne yntymaqtastyq uıymynyń Qyrǵyzstan máseleleri jónindegi arnaıy ókili, QR Parlamenti Májilisi Tóraǵasynyń orynbasary Jánibek Káribjanovbar.
