Mamyrda talantty jastarǵa arnalǵan sporttyq baǵdarlamalaýdan Qazaqstan chempıonaty bastalady

ASTANA. QazAqparat – Mamyr aıynda jas talanttarǵa jol ashatyn jáne eldiń IT-qaýymdastyǵyn nyǵaıtýǵa baǵyttalǵan sporttyq baǵdarlamalaýdan birinshi Qazaqstan chempıonaty bastalady. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın málim etti, dep habarlaıdy QazAqparat tilshisi.

Aıta keteıik, qańtarda «Digital Nomads» qaýymdastyǵynyń Memleket basshysy aldynda jarııalanǵan bastamalaryn iske asyrý aıasynda Sporttyq baǵdarlamalaý federatsııasy quryldy. Mınıstr dereginshe, bul elimizde atalǵan salany qarqyndy damytý men qoldaýǵa baǵyttalǵan. Sonymen qatar, ol qazaqstandyq baǵdarlamashylardyń álemdik arenada tanylýyna múmkindik beredi.

«Mamyr aıynyń basynda sporttyq baǵdarlamalaýdan jas talanttarǵa jol ashatyn jáne eldiń IT-qaýymdastyǵyn nyǵaıtýǵa kómektesetin birinshi Qazaqstan chempıonaty bastalady. Ol qazaqstandyq jáne halyqaralyq kompanııalardyń nazaryn aýdaratyn aýqymdy jáne qyzyqty is-shara bolmaq. Sporttyq baǵdarlamalaýdan Qazaqstan chempıonatynyń birinshi týry 7 mamyrda onlaın formatta ótedi. Chempıonatqa elimizdiń eń úzdik baǵdarlamashylarynyń arasynda óz kúshin synaǵysy keletin 14 jastan asqan kez kelgen adam qatysa alady», - dep jazdy Baǵdat Mýsın óziniń Telegram-arnasynda.

Onyń aıtýynsha, sporttyq baǵdarlamalaýdy qoldaý jáne Qazaqstan chempıonatyn ótkizý eldiń tehnologııalyq damýyn yntalandyrý men jas IT-mamandar úshin jańa múmkindikterge jol ashpaq.

Chempıonatqa qatysty barlyq málimetti myna silteme boıynsha ótip, kórýge bolady.