Mamyrda qyzanaq pen qııar baǵasy birden arzandady
Qııar, qyzanaqpen birge osy aıda jańa pisken kókónistiń de baǵasy túsken. Máselen, túıindi pııaz ben sábizdiń baǵasy 34,9 paıyzdan 15,2 paıyzǵa arzandaǵan. Dese de, qyzylshanyń baǵasy bir aıdyń ishinde 8,5 paıyzǵa, sarymsaq - 5,8 paıyzǵa, kartop - 5,1 paıyzǵa qymbattaǵan. Qyryqqabatty da turǵyndar ótken aıǵa qaraǵanda 3,1 paıyz arzan baǵaǵa satyp ala alady.
Jemis-jıdekterdiń ishinde bir aıda lımon (2,2%) men alma (1,4%) azdap qymbattaǵan. Apelsın 3,2 paıyzǵa arzandasa, tarynyń baǵasy 7,6 paıyzǵa ósken.
«Sonymen birge, joǵary sapaly jáne birinshi sortty bıdaı unynyń baǵasy bir aıdyń ishinde 2,1 paıyzǵa qymbattady. Baǵa jaǵynan makaron ónimderiniń ishinde tútik kespe - 1,2 paıyzǵa, lapsha pen vermıshel 1 paıyzǵa artqan. Nannyń baǵasy da azdap (1 paıyzǵa) kóterilgeni baıqalady», - deıdi taldaýshylar.
Sarapshylardyń taldaýyna súıensek, Ramazan aıyna baılanysty elimizde ettiń baǵasy kóterilgen. Atap aıtqanda, qoı eti bir aıda 3,1 paıyzǵa, jylqy eti 2,1 paıyzǵa, sıyr eti 1,9 paıyzǵa qymbattaǵan.
«Qazaqstan musylmandary dinı basqarmasy Orazaǵa baılanysty baǵany kótermeýdi, ár is saýap bolyp qaıtatytyn aıtqan edi», - delingen habarlamada.
Qus etiniń qymbattaǵany baıqalady: taýyq sany bir aıdyń ishinde 1,1 paıyzǵa, taýyq eti 1 paıyzǵa qymbattady. Al jumyrtqa kerisinshe 2,4 paıyzǵa arzandaǵan. Qatyrylǵan balyqtyń baǵasy - 2,9 paıyzǵa, konservi 1,9 paıyzǵa ósken. Sondaı-aq, jazǵa salym sýdyń baǵasy da 1,4 paıyzǵa óskeni ańǵarylǵan.
«Sút ónimderiniń baǵasy bir aıdyń ishinde 1 paıyzǵa ósti. Іrimshik pen shıki súttiń baǵasy 0,3 paıyzdan 1,5 paıyzǵa deıin arzandady», - delingen habarlamada.
