Mamyr merekelerine oraı Astanada qandaı sharalar ótedi?
ASTANA. QazAqparat - Qazaqstan halqynyń birligi kúnine oraılastyrylǵan basty shara 1 mamyrda «Qazaq eli» monýmentiniń aldyndaǵy alańda ótedi. Ashyq alańda teatrlandyrylǵan qoıylym kórsetiledi, oǵan ulttyq-mádenı birlestikterdiń shyǵarmashylyq ujymdarynyń, Astana qalasynyń Memlekettik fılarmonııasynyń ártisteriniń, horeografııalyq toptardyń jáne qazaqstandyq estrada juldyzdary qatysady, dep habarlady búgin Astana qalasynyń mádenıet, muraǵattar jáne qujattama basqarmasy.
Sonymen qatar, qala ákimdiginiń aldyndaǵy alańda (Beıbitshilik k-si, 11) halyqtyq serýen men tanymal ártisterdiń qatysýymen kontsert uıymdastyrylady.
1 mamyrda saǵat 17:00-de «Astana» kontsert zalynda «Astana» estradalyq-sımfonııalyq orkestriniń bas dırıjeri, eńbek sińirgen óner qaıratkeri Aleksandr Abylaevtyń 70 jyldyǵyna arnalǵan «Mereıtoıǵa tartý» atty kontserti ótedi.
6 mamyrda elorda turǵyndary men qonaqtary «Astana» kontsert zalynda Qazaqstannyń eńbek sińirgen ártisi Erlan Kókeevtiń jeke kontsertin tamashalaıdy. Kontserttik baǵdarlama áıgili «K-7» tobynyń tanymal kompozıtsııanyń qurmetine «Tanets pod dojdem» dep atalady. Kórermender nazaryna erekshe stsenografııaǵa negizdelgen qoıylym usynylady. Shara barysynda Erlan Kókeevtiń halyq súıip tyńdaıtyn eski ánderinen basqa jańa hıtter de oryndalady. Kontsert qonaqtary - «Dos-Muqasan» VAA, Janna Orynbasarova jáne «ABK» toby.
7 mamyrda elordada Qazaqstan Respýblıkasynyń Qarýly Kúshteriniń 25 jyldyǵyna arnalǵan áskerı parad ótedi.
Qazirgi kezde Jeńis kúnine daıyndyq júrgizilýde. Merekelik sharalar legi Uly Otan soǵysynda qaza bolǵandarǵa taǵzym etý rásiminen bastalady. 8 mamyrda Ortalyq qalalyq zıratta Uly Otan soǵysy jyldarynda alǵan jaraqattardan kóz jumǵan jaýyngerlerdiń zıratyna «Dańq gúl tizbegi» men gúl shoǵy qoıylady.
Munymen qosa, osy kúni «Astana» kontsert zalynda Marjan Arapbaeva, Qaırat Baekenov, Rınat Malsagov, Rústem Nurjigitov jáne taǵy basqalardyń qatysýymen 9 mamyr - Jeńis kúnine arnalǵan kontsert ótedi.
Jeńis kúni «Otan qorǵaýshylar» monýmentine «Dańq gúl tizbegin» qoıý saltanaty jáne Uly Otan soǵysyna qatysýshylardyń urpaqtarynyń «Astana Jaýjúrek polki - álem marshy» sherýi uıymdastyrylady.
Sharaǵa qatysýshylar saǵat 12:30-da «Qazaq eli» monýmentiniń aldynda jınalady, sherý «Otan Qorǵaýshylar» monýmentiniń janynda aıaqtalady. Sondaı-aq, «Stýdenttik» saıabaqta áskerı qalashyq ornalasady, onda 11 áskerı palatka qoıylady, soǵys ardagerleri men tyl eńbekkerlerine arnalǵan merekelik dastarqan jaıylady.
9 mamyrda qalalyq alańda jáne «Stýdenttik» saıabaqta merekelik kontsert uıymdastyrylyp, soǵys jyldaryndaǵy áskerı ánder oryndalady.
Qazaqstan halqynyń birligi kúni, Otan qorǵaýshy kúni jáne Jeńis kúnin merekeleý aıasynda elordanyń barlyq mádenı mekemelerinde merekelik sharalar, kitaphanalarda, mýzeılerde, teatrlarda taqyryptyq kórmeler, kontsertter men spektaklder ótedi.
