Mamyr merekelerinde 2 iri asteroıd Jerge jaqyn ushady

NUR-SULTAN. QazAqparat – 6 jáne 9 mamyrda eki iri asteroıd Jerdiń mańyna jaqyn ushyp ótedi, dep habarlaıdy QazAqparat tilshisi Astro News-ke silteme jasap.

AQSh - NASA Aeronavtıka jáne ǵarysh keńistigin zertteý jónindegi ulttyq basqarmasy seriktes teleskoptar jelisi men Planetarlyq qorǵanys úılestirý bıýrosy arqyly barlyq asteroıdty baqylaıdy. Basqarma olardy Jer úshin qaýipti jáne qaýipsiz dep jikteıdi.

Eki asteroıdtyń – 2009 JF1 jáne 467460 (2006 JF42) jýyrda Jerge jaqyndaýyna keletin bolsaq, habarlamada olardyń ushyp ótýinen qaýip joqtyǵy aıtylady. 2009 JF1 asteroıdynyń dıametri - shamamen 10 metr ǵana jáne ol 2022 jyldyń aqpan aıynda Eýropalyq ǵarysh agenttiginiń baqylaý tiziminen shyǵaryldy. Baqylaýlar onyń Jermen soqtyǵysý yqtımaldyǵy az ekenin kórsetken bolatyn.

Ekinshi 2006 JF42 asteroıdy anaǵurlym iri, dıametri – 380-nen 860 metrge deıin. Sonymen qatar, ol bizdiń planetamyzǵa 5,7 mln shaqyrymǵa jaqyndaıdy. Bul - Jer men Aıdyń ortasha qashyqtyǵynan 14 ese artyq.

NASA-nyń sońǵy aqparatyna sáıkes, «Baqytymyzǵa qaraı, kem degende 100 jyl boıy Jerge belgili bir asteroıdtyq qaýipter tónip turǵan joq».

Buǵan deıin alǵashqy jeke ǵarysh mıssııasy HǴS-ǵa jetkenin habarlaǵan edik.