Mamyr aıynyń 1-inen bastap UOS ardagerleri men múgedekteri temirjol kólikterimen tegin júretin bolady

ASTANA. Sáýirdiń 13-i. QazAqparat /Gúlmıra Álıakparova/ - Mamyr aıynyń 1-inen bastap Uly Otan soǵysynyń ardagerleri men múgedekteri temir jol kólikterimen tegin júretin bolady. Bul týraly búgin ótken baspasóz máslıhatynda «Qazaqstan temir joly» Ulttyq kompanııasy» AQ-nyń vıtse-prezıdenti Ermek Qızatov málim etti,

dep habarlaıdy QazAqparat.

E.Qızatov atap kórsetkendeı, mamyrdyń 1-31-i kúnderi aralyǵynda oblysaralyq baǵyttaǵy barlyq poıyzdarda UOS ardagerleri men múgedekteri úshin jolaqysy tegin bolady. Al mamyrdyń 3-i men 12-si kúnderine bılet satyp alǵandarǵa poıyzdardyń meıramhanasy tegin qyzmet kórsetetin bolady. Bıletterdi ardagerdiń tólqujaty men soǵysqa qatysqandyǵy týraly kýálikti usyný arqyly barlyq temirjol kassalarynan satyp alýǵa bolady.

«Mamyr aıy boıy ardagerler úshin Qazaqstannyń ishinde jáne TMD elderi aýmaǵyna baryp-kelý sapary tegin bolady», - dedi ol. Biraq E.Qızatovtyń sózine qaraǵanda, ardagerlerdiń birjolǵy sapary ǵana tegin bolmaq.

Qazaqstan temirjoly sondaı-aq, Uly Jeńistiń 65 jyldyǵyn atap ótýge arnalǵan merekelik sharalarǵa qatysatyn (mamyrdyń 3-12) ardagerlerdi Astana men Máskeýge tegin aparyp-keletin bolady. Bıletterdi resimdeýmen ákimdikter aınalysady.

QTJ bul maqsattarǵa 30 mıllıon teńge qarajat jumsaýdy kózdep otyr. Vıtse-prezıdenttiń aıtýynsha, bul ıgi isti aldaǵy ýaqytta dástúrge aınaldyrý josparda bar.