Mamyr aıynyń 1-ine deıin barlyq ákimdikter óz aýmaqtarynda mal soıý beketterin nemese alańdaryn qamtamasyz etýi kerek - S.Súleımenov
ASTANA. Qańtardyń 22-si. QazAqparat /Marlan Jıembaı/ - Mamyr aıynyń 1-ine deıin barlyq ákimdikter óz aýmaqtarynda mal soıý beketterin nemese alańdaryn qamtamasyz etýi kerek. Bul týraly búgin Aýyl sharýashylyǵy mınıstrligi Agroónerkásip keshenindegi memlekettik ınspektsııa komıtetiniń tóraǵasy Serik Súleımenov málim etti.
Onyń aıtýynsha, qazirgi ýaqytta mınıstrlik barlyq oblys ákimdikterimen kelisimshart jasasýda. Atalǵan qujatqa sáıkes ákimdikter ózderiniń aýmaǵyndaǵy barlyq eldi mekenderdi qajetti mal soıý beketterimen jáne alańdarymen qamtamasyz etýi qajet. Ol úshin aǵymdaǵy jyly mamyrdyń 1-ine deıin ýaqyt berilgen.
«Búgin biz Aqtóbe, Batys Qazaqstan, Qaraǵandy, Mańǵystaý, Pavlodar jáne Soltústik Qazaqstan oblystary ákimdikterimen kelisimshartqa qol qoıdyq. Qalǵan oblystar 1-2-i kúnniń ishinde osy qujatqa qol qoıyp jiberedi. Osyǵan sáıkes barlyq oblystar mamyrdyń 1-ine deıin óz aýmaqtaryn mal soıý beketterimen nemese alańdarymen qamtamasyz etetin bolady», dep atap ótti komıtet tóraǵasy.
Búgingi kúni respýblıka boıynsha salynǵan mal soıý beketteri men alańdarynyń úlesi 33,1 paıyz bolyp otyr. Jalpy mınıstrlik jergilikti atqarý organdarmen birlesip naqty jumystar atqarýda. Sonyń nátıjesinde Shyǵys Qazaqstan oblysy - 75,7, Batys Qazaqstan oblysy - 55, Ońtústik Qazaqstan oblysy - 48,7 paıyzǵa mal soıý beketterimen nemese alańdarmen qamtamasyz etilgen. Al keıbir oblystardaǵy bul jumystardyń nátıjesi tym mardymsyz. Olarda atalǵan oryndarmen qamtamasyz etilý deńgeıi 20 paıyzǵa da jetpeıdi.
Komıtet basshysynyń aıtýyna qaraǵanda, sońǵy bir jarym aıdyń ishinde mal soıý beketteriniń sany 221-den 251-ge ulǵaıǵan, degenmen respýblıka boıynsha osyndaı 1495 oryn qajet. Bul kórsetkish ýaqytsha mal soıý alańdarynda da jaqsaryp kele jatqandyǵy baıqalady. Máselen, osydan 1,5 aı buryn 313 ýaqytsha alań bolsa, qazir onyń sany 593-ke jetken. Al respýblıkalyq qajettilik 1925 alańdy quraıdy.
